Dili,14 Maiu 2026 - Vise-Prezidente Komisaun Ezekutiva (KE) BTL, E.P ba Asuntu Tékniku, José Filipe Ximenes Smith no Vise-Prezidente Komisaun Ezekutiva (KE) BTL, E.P ba Asuntu Korporativu Manuel Tomás Amaral de Carvalho hamutuk ho Jestór DAK ho ekipa no Ofisiál Legál, halo sosializasaun regulamentu ne’ebé abrigu iha Dekretu Lei no Diploma Ministeriál sira kona-bá tabela tarifária, proibisaun ba koneksaun ilegál no kritéria atu sai kliente BTL, E.P nian ba komunidade sira, iha aldeia Sare suku Lahane Oriental postu-administrativu Nain Feto Munisipiu Dili.
Iha atividade sosializasaun ne’e, BTL, E.P partilla informasaun detalla Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mós Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Objetivu Ekipa BTL,E.P halo atividade sosializasaun ne’e,hodi fahe uluk informasaun kona-bá, kna’ar BTL, E.P nian no regulamentu sira ne’ebé sita ona iha leten ba konsumidór sira, atu nune’e sira bele hatene no kompriende ,banhira ekipa tekniku sira halo melloramentu sistema kanalizasaun bee no instalasaun metru kontadór ba sira nia uma iha Area ne’e.
Durante sosializasaun Vise-Prezidente KE BTL, E.P ba asuntu tékniku hatete, importánsia husi sosializasaun ida ne’e, atu esplika kona-bá prosedimentu sira, liu-liu dever, direitu no responsabilidade nudár kliente nian,ho nune’e, husu ba autoridade no komunidade sira iha aldea ne’e atu tau matan ba fasildiade bee nian ne’ebé BTL,E.P instala ona iha idak-idak nia fatin, atu kuidadu nune’e bele uza ba tempu naruk.
Alende ne’e, Vise-Prezidente BTL, E.P. ba Asuntu Korporativu husu ba Autoridade Lokal no komunidade sira ne’ebe partisipa iha atividade sosializasaun ne’e atu kontinua fahe informasaun ba komunidade sira ne’ebe la partisipa iha atividade sosializasaun ne’e,tanba maioria komunidade sira la hola parte iha atividade sosializasaun ne’e. Nune’e, wanhira ekipa tekniku BTL,E.P halo melloramentu sistema beemos iha aldeia ne’e labele halo inpedimentu.
Iha atividade sosializasaun ne'e, Jestór DAK esplika detalla ba komunidade sira kona-bá utilizasaun metru kontadór no prosesu rekolla tarifa bee, wainhira parte DAK tun ba lee metru kontadór, kliente sira iha dever no obrigasaun atu hahú selu tarifa bee fulan-fulan.
Durante sosializasaun ne’e Autoridade Lokal no komunidade sira hato’o preokupasaun,no rekomendasaun balun liga ho probleme bemos iha aldeia ne'e no BTL, E.P fó kedas resposta atu rezolve preokupasaun Komunidade nian ne’e iha tempu badak.
Fó hanoin katak dadaun ne’e Ekipa Tekniku BTL,E.P instala ona kanu distribuisaun bemos no metru kontadór ba komunidade balun iha aldeia ne’e no iha tempu besik sei kontinua instala tan ba uma kain balun iha fatin referida.
Iha atividade sosializasaun ne’e,partisipa husi Reprezentante Prezidente Autoridade Munisipiu Dili ne'ebe reprezenta husi Sekretariu Munisipiu Dili ba asuntu Sosial no Reprezentante Autoridade postu administrativu Nain Feto ,Diresaun Nasional Regulasaun Agua no Saneamentu (DNRAS) Lideransa Komunitária, Polisia Komunitaria no komunide sira iha aldeia Sare suku Lahane Oriental.
Fahe ba Sosial Media:
