Díli, 27/11/2025. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, José Filipe Ximenes Smith akompaña hosi Jestór O&M BTL, E.P, Ofisiál Legál ho ekipa DAK BTL, E.P disemina informasaun ne'ebé abrigu iha Dekretu Lei no Diploma Ministeriál BTL, E.P nian, kona-bá knaar BTL, E.P nian, tabela tarifária no regulamentu sira seluk, ba abitante sira, iha aldeia Becusse Centro, suku Becora, Postu-administrativu Cristo Rei.
Sosializasaun liga ba Dekretu Lei no Diploma Ministeriál ne’ebé mak BTL, E.P disemina hanesan Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Realizasaun atividade sosializasaun ne’e ho objetivu, hodi partilla uluk informasaun kona-bá regulamentu hotu ba konsumidór sira, molok halo melloramentu ba sistema kanalizasaun bee ba iha aldeia Becusse Centro, atu nune’e wainhira servisu melloramentu to’o iha aldeia ne’e, komunidade sira bele koopera ou servisu hamutuk ho tékniku BTL, E.P nian, iha terrenu.
Vise-Prezidente KE BTL, E.P ba Asuntu Tékniku hatete, hafoin sosializasaun ida ne'e, iha tempu besik tékniku BTL, E.P nian sei tun fila-fali mai iha aldeia iida ne’e, hodi halo melloramentu ba sistema bee, hodi desmantela hotu koneksaun ilegál sira, iha aldeia Becusse Centro, nune’e bele instala foun no monta metru kontadór ba uma kain ida-idak.
Tanba ne'e, Vise-Prezidente KE BTL, E.P ba Asuntu Tékniku husu komunidade no Lideransa Komunitária sira, atu kolabora ho ekipa BTL, E.P nian, atu nune’e labele interven servisu iha terrenu. Nune’e mos, wainhira instalasaun kanu to’o iha aldeia refere, solisita atu tau matan ba sistema kanalizasaun no labele estraga fasilidade bee sira.
Iha biban ne’e, Komandante Polísia Komunitária iha Postu-Administrativu Cristo Rei husu ba komunidade sira atu koopera, wainhira tékniku BTL, E.P nian tun ba halo melloramentu no labele halo impedimentu, nune’e ekipa BTL, E.P bele kanaliza bee ba aldeia ida ne’e.
Durante iha atividade sosializasaun ne’e, komunidade sira hato’o sira-nia preokupasaun kona-bá problema bee moos, rekomendasaun no susjestaun balun, BTL, E.P anota no sei halo intervensaun liuhosi servisu melloramentu ba sistema bee iha tempu badak, nune’e hodi responde ba kestaun hirak ne’e.
Partisipa iha atividade sosializasaun ne’e mak Lideransa Komunitária, Komandante Polísia Komunitária iha PA Cristo Rei no abitante sira hosi aldeia Becusse Centro
Fahe ba Sosial Media:
