Ministru Infraestrutura, Sr. Júlio do Carmo no Sekretáriu Estadu Eletrisidade, Bee no Saneamentu (SEEAS, sigla portugés), Sr. Santos Noronha ho Dirijente MOP no SEEAS nian hala’o vizita ofisiál ba edifísiu Bee Timor-Leste, Empreza Públika (BTL, E.P), Caicoli, Díli no simu direta hosi Prezidente Komisaun Ezekutiva (KE) BTL, E.P, Eng. Carlos Peloi dos Reis, Vise-Prezidente KE BTL, E.P ba Asuntu Sistema Bee, Saneamentu no Drenajen, Sr. Gustavo da Cruz, Vise-Prezidente KE BTL, E.P ba Asuntu Boa Governasaun no Fortalesimentu Institusionál, Sra. Elizabeth Amaral, kargu Xefia no funsionáriu sira.
Objetivu hosi vizita ne’e, hodi observa kondisaun jerál nomos hodi ko’alia no rona direta funsionáriu sira nia preokupasaun, atu bele buka solusaun. Alende ne’e, hodi rona mos orientasaun ou informasaun balun hosi MOP, VMI no SEEAS.
Iha biban ne’e, Sr. Ministru Obras Públikas husu ba funsionáriu BTL, E.P tomak, atu kontinua servisu. Maibé tenke servisu ho vontade tomak, hatudu atetude ne’ebé di’ak nomos servisu ho responsabilidade, nune’e bele serví povu no nasaun ida ne’e di’ak liu tan, liuhosi fornesimentu bee moos. Tanba iha setór bee hanesan servisu ne’ebé liga direta ho ema nia moris.
“Ha’u ko’alia makaas oitoan iha BTL, E.P, tanba servisu ida ne’e servisu ida ne’ebé importnate teb-tebes kompara ho unidade sira seluk, tanba ita nia servisu ligasaun direta ho ema nia vida moris’ la’ós oras ba oras, minutu ba minutu, maibé detik ba detik ema sempre hemu bee. Ha’u husu ba ita hot-hotu, ba ha’u nia alin sira lori matebian sira no ema sira ne’ebé mate ba rai ida ne’e, ho sira nia naran no sira nia hanoin tomak, fó hatene ba imi hotu, atu servisu ho laran no fuan ba, hodi kuidadu ita nia rai ne’e. Katak servisu ba ita nia rai, servisu hanesan buat ne’e imi nian rasik”.
“Servisu didi’ak ba servisu ho laran ba, iha problema ruma mai ita ko’alia iha oin hanesan maun ho alin, hanesan timoroan tau uluk ita nia preokupasaun ba depois ita buka solusaun no labele kria problema hodi impede servisu. Ha’u iha ne’e, vise no sekretáriu estadu iha ne’e, ami mai laran metin ba imi hotu. Mai ita servisu hamutuk, rai timor ita nian, ne’ebé rai kiik no foin hamrik mai ita hotu tane nia para nia bele la’o nafatin. Tanba ne’e, ha’u husu ba imi ne’ebé servisu iha instituisaun ne’ebé importante, mai ita hotu hamutuk ho servi ita nia povu no ita nia rai ida ne’e di’ak liu tan”, dehan Sr. Ministru.
Ligadu ho komunidade balun kontinua halo ligasaun bee ho dalan ilegál hirak ne’e, Ministru Obras Públikas orienta ou solisita ba BTL, E.P atu nafatin halo sosializasaun, tanba populasaun barak mak seidauk iha konsiénsia hodi uza bee tuir regras. Nune’e presiza maximiza sosializasaun hodi disemina informasaun kona-bá utilizasaun bee tuir padraun ou regras ne’ebé mak loos no di’ak.
Sr. Ministru mos apresia ba funsionáriu sira nia servisu, liu-liu tékniku sira ne’ebé hala’o servisu iha terrenu, maske tékniku balun hetan baku ou agresaun fíziku hosi komunidade sira, iha oras servisu nian iha terrenu.
Enkuantu, tuir dadus atuál funsionáriu BTL, E.P hamutuk 365 inklui Komisaun Ezekutiva nain tolu. No funsionáriu sira ne’e rekrutadu tuir regulamentu BTL, E.P nian.
Fahe ba Sosial Media:
