Liquiça, 15/02/2023, Tékniku Operadór (TO) Bee Timor-Leste, Empreza Públika (BTL, E.P) munisípiu Liquiça ho traballadór Mão de Obra (MdO) hamutuk ho estajiáriu sira hosi Sentru Formasaun Dom Bosco Comoro Díli, hadi’a bee matan E-Ana Loa, ne’ebé hetan estragus hosi dezastre naturais (udan) iha munisípiu Liquiça.
Udan durante loron tolu, nune’e afeta direta ba bee matan E-Ana Loa, hodi la funsiona durante loron lima, nune’e perturba sirkulasaun bee ba WTP Sarlema. Maibé hafoin identifka estragus ne’e, tékniku sira tun ba terrenu hodi halo intervensaun.
Hafoin ekipa téknika halo intervensaun, konsege rezolve hikas bee matan ne’e, hamoos no daudaun ne’e sirkulasaun bee hosi bee matan liuhosi intake ba WTP Sarlema la’o di’ak fila-fali hanesan baibain.
Enkuantu bee matan E-Ana Loa mak distribui bee ba WAP Sarlema, hafoin mak fornese fila-fali ba komunidade sira iha aldeia Pukelara, Kamalelara no Leopa, suku Dato, postu-administrativu Liquiça Villa.
Fahe ba Sosial Media:
