Díli, 20/06/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz ho Vise-Prezidente KE BTL, E.P ba Asuntu Boa Governasaun no Fortalesimentu Institusionál, Sra. Elizabeth Amaral partisipa iha enkontru koordenasaun servisu bee rurál entre MOP-MAE-Autoridade Munisipál sira, ne’ebé realiza iha salaun enkontru Hotel Timor.
Reuniaun koordenasaun ne’e, hodi asegura sustentabilidade sistema bee rurál no efikásia OJE ne’ebé tinan ba tinan investe iha setór refere liuhosi koordenasaun servisu MOP, MAE no munisípiu sira, MOP no MAE fasilita apoiu tékniku ba iha SMASA, hadi’a liña koordenasaun servisu entre instituisaun sira ne’ebé fó apoiu ba bee no saneamentu nomos atu hetan konkordánsia kona-bá mekanizmu MOP hamutuk ho MAE bele apoiu munisípiu (SMASA) nia implementasaun matadalan setorál.
Enkontru koordenasaun ne’e, abertura direta hosi S.E Ministru Obras Públikas (MOP), Sr. Samuel Marçal. Iha intervensaun Ministru Obras Públikas hatete diskusaun ne’e importante tebes, tanba ne’e husu ba partisipante sira, atu deskute ho didi’ak no deskute ho interese nasionál, atu nune’e servisu bele susesu ou hetan rezultadu di’ak, hodi serví povu no sira bele kontente.
Entidade sira ne’ebé partisipa iha enkontru koordenasaun ne’e mak Sekretáriu Estadu Asuntu Toponímia no Organizasaun Urbana, Sekretáriu Estadu Dezenvolvimentu Lokál, MOP, MAE, BTL, E.P rasik, Prezidente Autoridade munisípiu sira no partisipante sira seluk.
Fahe ba Sosial Media:
