Díli, 20/10/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis, ho II Vise-Prezidente K.E BTL, E.P Sra. Elizabeth Amaral ho ekipa Partisipa no halo mos aprezentasaun iha Sesaun Aprezentasaun Relatóriu Ezekusaun III Trimestre (Q3) OJE 2022 no Kalendáriu Taka Ezersísiu Orsamentál Tinan Finanseira 2022, ne'ebé realiza iha Salaun Novo Turismo, Díli. No sesaun aprezentasaun ne’e, abertura direta hosi Ministru Obras Públikas (MOP).
Iha abertura, S.E Ministru Obras Públikas (MOP) Eng. Abel Pires da Silva, hatete iha fulan tolu nia laran tuir mai, sei iha servisu ne’ebé mak barak liu tan, tamba ne’e, hanesan Jestór iha Ministériu ida ne’e, presiza ema hotu nia kontribuisaun, tamba servisu sira iha MOP ne’e boot no barak, maibé tenke halo ou ezekuta duni, ho nune’e servidór Estadu sira hotu ne’ebé tutela iha MOP iha fatin ida ne’e, importante tebes, tamba la’os de’it servisu mak boot no barak maibé nia orsamentu mos boot tebes, tamba ministériu ida ne’e (MOP) mak jere projetu ho nia númeru orsamentu ne’ebé mak boot, nune’e iha tinan hirak mai oin, MOP sei iha servisu ne’ebé sei barak no todan liu tan, ho ida ne’e, Diresaun Jerál no Instituisaun Autónomu sira ne’ebé tutela iha MOP, presiza halo preparasaun ba servisu hirak ne’e.
Alende ne’e, S.E Ministru Obras Públikas konsidera Diresaun Jerál no Instituisaun Autónomu sira (funsionáriu) hotu iha MOP importante tebes, nune’e S.E Ministru mos husu ba parte hotu, wainhira iha ideia ruma ne’ebé mak di’akatu hadi’a ministériu ida ne’e, bele hato’o S.E Ministru konsidera iha ne’e pertinente no nafatin nakloke. Ministru mos rekoñese katak buat hotu seidauk di’ak, maibé fiar katak MOP nafatin ho parte hotu, hodi prepara kondisaun, atu oinsá bele servi di’ak liu tan ba nasaun no povu Timor-Leste (TL).
Nune’e mos iha intervensaun, S.E Vise-Ministru Obras Públikas hatete, MOP iha orsamentu ne’ebé boot liu-liu iha Kapitál Dezenvolvimentu tamba ne’e, S.E VMOP husu ba kargu xefia sira hotu, liu-liu ba iha Diresaun Jerál Obras Públikas atu aselera hodi orienta empreza sira atu hato’o lalais enkuadramentu, nune’e ezekusaun orsamentu ba iha Kapitál Dezenvolvimentu bele to’o iha 70% ou 80%. No VMOP mos husu ba parte hotu, atu nafatin servisu hamutuk, hodi atinji metas ne’ebé mak iha.
Iha biban ne'e, II Vise-PrezidenteK.E BTL, E.P Sra. Elizabeth Amaral halo mos aprezentasaun kona-bá Relatóriu Ezekusaun Orsamentu tinan 2022 ba Q3 ou III Trimestre nian, hosi OJE ne'ebé aloka ba BTL, E.P iha kategoria haat, hanesan Saláriu no Vensimentu, Kapitál Minor, Kapitál Dezenvolvimentu no Bens & Servisu inklui atividade sira ne’ebé hala’o iha tinan 2022 ne’e, nomos Planu ba Tinan 2023 nian.
Hafoin aprezentasaun hosi BTL, E.P, liu-liu kona-bá reseitas S.E VMOP hatete, bazeia dadus estatístiku ne’ebé mak iha, S.E VMOP fó parabens ba Prezidente K.E BTL, E.P no husu atu nafatin esforsu hodi aumenta iha parte reseitas nian, tamba Ministériu Finansas (FM) no Parlamentu Nasionál (PN) hakarak e presiza liu mak reseitas, tamba transforma ona ba Empreza Públika, tenke sustenta ba nesesidades rasik, atu nune’e labele dependénsia ba OJE, maibé S.E VMOP mos rekoñese katak BTL, E.P foin harii iha tinan rua, nune’e presiza apoia, maibé ba tinan hirak mai oin, tenke esforsu hodi dezenvolve sira-nia Empreza rasik.
Alende aprezentasaun hosi BTL, E.P, iha mos aprezentasaun hosi parte DGAF/DNOF, kona-bá Relatóriu Ezekusaun OJE 2022, Komentáriu Avaliasaun jerál no Atividade Prinsipál 2022 hosi DGOP no DGHPU nomos Aprezentasaun Relatóriu Ezekusaun no Avaliasaun Jerál nomos Atividade Prinsipál sira 2022 hosi ANAS, I.P EDTL, E.P, ANE, I.P no IGE, I.P. Aprezentasaun ikus liu hosi Xefe Departamentu Finansas DNOF kona-bá Kalendáriu Taka Konta OJE, hodi esplika kona-bá regra jerál sira relasiona ho taka Ezersísiu Taka Orsamentu Tinan Fiskál 2022.
Molok atu remata sesaun ne’e, VMOP hatete presiza reforsa iha planeamentu no liña koordenasaun (liña komunikasaun) entre parte hotu no instituisaun relevante sira seluk (Esternál), tamba komunikasaun ne’e importante, nune’e parte hotu tenke nafatin komunika ba malu, hodi bele iha asaun ne’ebé konkreta, atu ezekusaun bele atinji tuir koordenasaun ne’ebé mak iha katak hosi superior to’o funsionáriu sira ou vertikál to’o horizontal, nune’e bele lori dezenvolvimentu ba iha MOP.
Partisipa iha sesaun aprezentasaun ne’e, mai hosi kada Diresaun Jerál no Nasionál nomos Ajénsia Autónoma sira ne’ebé tutela iha MOP, hanesan DGAF, DNOF, DNA, DNAGP, DNRH, UP, DGOP, DNEPCC, DNPD, GIA, DGHU, DNH, DNU, DNE, Gab.MOP rasik, Gab. VMOP, nomos Ajénsia Autónoma sira hanesan IGE, I.P, BTL, E.P, EDTL, E.P, ANE, I.P, ANAS, I.P inklui PMU.
Fahe ba Sosial Media:
