Baucau, 28/02/2023, II Vise-Prezidente Komisaun Ezekutiva (KE), Bee Timor-Leste, Empreza Públika (BTL, E.P), Sra. Elizabeth Amaral, akompaña hosi Diretór Operasionál no Manutensaun (DOM) nomos Jestór hosi Departamentu Apoiu Kliente (DAK) enkontru ho Koordenadora, Ofisiá Finansas no Ofisiál Tékniku Junior Apoiu BTL, E.P Baucau, iha edifísiu BTL, E.P Baucau.
Enkontru ne’e rasik, hodi ko’alia kona-bá servisu finansas no apoiu kliente nian, nomos servisu relevante sira seluk, liga ba servisu sistema bee moos nian. Husu ba funsionáriu/tékniku BTL, E.P munisípiu Baucau nian, atu ezekuta servisu tuir planu ne’ebé mak traxa ona ba iha munisípiu ne’e rasik.
Durante iha enkontru ne’e, II Vise-Prezidente KE BTL, E.P hatete hanesan Komisaun Ezekutiva nafatin apoiu ba servisu hotu iha Baucau no nafatin enkoraja ba funsionáriu sira atu servisu makaas, hodi serví povu no nasaun ne’e, liuhosi setór bee moos. Alende ne’e, rekomenda ba funsionáriu sira, wainhira hala’o servisu tenke tau mos atensaun ba saúde ou kuidadu saúde, nune’e saúde nafatin di’ak, atu bele kontinua halo servisu.
Iha sorumutu ne’e mos, Diretór DOM ko’alia liga ba parte operasaun no manutensaun ba sistema ne’ebé ezistente inklui lala’ok alargamentu sistema bee ba bairo sira.
Hafoin remata iha Baucau, II Vise-Prezidente KE BTL, E.P ho ekipa kontinua dezloka ba munisípiu Viqueque, hodi partisipa iha atividade "konsultasaun sidadania" ne’ebé realiza hosi Ministériu Finansas (MF), iha Munisípiu Viqueque”.
Enkuantu iha atividade konsultasaun sidadania ne’e, BTL, E.P mos sei halo aprezentasaun kona-bá “Bee no Saneamentu (Foku ba Prioridades no Alvu sira inklui Rezultadu Atinjidu)”.
Molok halo aprezentasaun iha atividade konsultasaun sidadania ne’e, II Vise-Prezidente KE BTL, E.P ho ekipa hala’o vizita ba edifísiu BTL, E.P munisípiu Viqueque, hodi enkontru ho Koordenadór ho funsionáriu BTL, E.P Viqueque nian, hodi enkoraja nafatin funsionáriu sira, atu hala’o servisu ho di'ak no presiza maximiza volume servisu hodi atende públiku, liu-liu atu bele hatan ba populasaun sira nia preokupasaun kona-bá bee moos no rekomenda ba funsionáriu sira atu ezekuta servisu tuir planu tarefa ne'ebé mak iha, maibé nafatin kuidadu saúde, atu nune'e labele prejudika ba servisu.
Fahe ba Sosial Media:
