Díli, 26/01/2023, I Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, partisipa iha Konsultasaun Públika Nasionál kona-bá Atualizasaun Planu Mestre ba Urbanizasaun Sidade Díli, ne'ebé realiza iha Sentru Konvesaun Díli (CCD, sigla portugés).
Atividade Konsultasaun Públika ne'e, organiza hosi Ministériu Planu no Ordenamentu (MPO) ho objetivu atu aprezenta senáriu dezenvolvimentu ne’ebé hili ona kona-bá Planu Mestre Urbanu Díli ba parte interesada ou stakeholder sira, atu asegura kompreensaun mútuo kona-bá dezenvolvimentu Planu Mestrenian no atu halibur apoiu hosi parte interesada sir aba iha Planu Asaun Futuru nian. Katak liuhosi Konsultasaun Públika ne’e, bele hetan komentáriu, ideia ou opiniaun no rekomendasaun sira, hosi parte hotu ne’ebé partisipa iha atividade refere, nune’e bele hadi’a konteúdu sira ne’ebé hatuur ou eziste ona iha proposta refere.
Durante iha Konsultasaun Públika ne’e, Konsultór sira halo aprezentasaun kona-bá “Kondisaun Atuál Sidade Dili no Rezultadu Estudu ne’ebé Realizadu kona-bá Planu Urbanizasaun Díli”. Nomos aprezentasaun kona-bá “Proposta Planu Urbanizasaun ba Sidade Díli”.
Iha intervensaun, S.E Vise-Primeiru-Ministru (VPM) no Ministru Planu no Ordenamentu (MPO), José Maria dos Reis, husu ba entidade relevante sira ne’ebé servisu besik liu ba infraestrutura sira, hodi fó opiniaun ruma, hodi hadi’a di’ak liu tan kona-bá Planu Urbanizasaun Díli nian, nune’e ba futuru ema hotu bele moris iha sidade ida ne’ebé furak nomos lori ema hotu bele sai di’ak no moris ho dignu iha kapitá Díli.
Atu konklui, S.E VPM no MPO agradese ba entidade sira ne’ebé partisipa iha Konsultasaun Públika ne’e, bele mos biban ba desizaun VIII Governu Konstitusionál ne’ebé mak determina elaborasaun Planu Urbanizasaun Díli nian. VPM no MPO agradese mos ba JICA ne’ebé kolabora ho Governu Timor-Leste (GovTL) iha prosesu dezenvolvimentu Planu Urbanizasaun Díli nian. Nomos agradese ba Konsultora LAPI ITB ne’ebé hamutuk ho Diresaun Nasionál Planeamentu Urbanu hodi konklui kompromisu atu dezenvolve instrumentu ba planeamentu territoriál no materializa Governu nia Polítika.
Daudaun ne’e Ministériu Planu no Ordenamentu (MPO) hahú ona halo publikasaun liuhosi Jornál Repúblika, atu hahú halo audiénsia públika ba iha planu nasionál ordenamentu territóriu ne’ebé mak sei hahú iha fulan fevereiru to’o abril, nune’e entidade relevante sira bele partisipa hodi fó komentáriu, opiniaun no rekomendasaun ruma, ba iha Planu Nasionál no Ordenamentu Territóriu molok submete ba Konsellu Ministru (KM) aprova, sai Dekretu Lei ida atu vinkula ba prosesu dezenvolvimentu ida ne’ebé integradu, justu no sustentável.
Atividade Konsultasaun Públika ne’e, partisipa hosi JICA, Ministériu, Empreza no Instituisaun relevante sira, sosiedade sivil nomos entidade sira seluk.
Fahe ba Sosial Media:
