Díli, 03/02/2023, I Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) Partisipa iha Konsulta Públika ho parte interesada sira ba preparasaun relatóriu Revizaun Nasionál Voluntária daruak (RNV 2.0), kona-bá progresu Timor-Leste (TL) hosi Objetivu sira ba Dezenvolvimentu Sustentável (ODS) no ba ajenda tinan 2030. Ou Konsultasaun Públika kona-bá Revizaun Voluntáriu Nasionál Daruak iha ámbitu Implementasaun ODS iha Timor-Leste (TL) tinan 2023 (RNV 2.0), ho tema “Dezenvolvimentu Sustentável ne’ebé Sentraliza iha Ema-La Husik Ema Ida Iha Kotuk”. Eventu konsultasaun ne'e realiza iha auditóriu Ministériu Finansas (MF), Aitarak-Laran.
Konsulta Públika ne’e ho objetivu, hodi informa, konsulta, deskute no simu feedback hosi parte interesada sira hotu, kona-bá konsulta nasionál voluntária daruak. Katak fó biban ba parte interesada sira hodi forma kestaun xave no mensajen sira hosi relatóriu VNR nian ba daruak, atu revé progresu no dezafiu sira hosi ODS no identifika dalan sira hodi aselera ba implementasaun. Eventu konsulta nasionál ne’e, partisipa hosi Primeiru Ministru (PM), S.E Taur Matan Ruak, hetan apoiu hosi Nasoens Unidas, partisipa mos hosi parte interesada sira hanesan, membru Governu, Parlamentu Nasionál (PN), Nasoens Unidas, autoridade lokál, korpu diplomátiku, parseiru dezenvolvimentu sira, akadémiku, sosiedade sivil no setór privadu.
Iha diskursu Abertura, Primeiru Ministru, S.E Taur Matan Ruak hatete, Revizaun Nasionál Voluntária daruak ho títulu “Ema nu’udár sentru ba Dezenvolvimentu Sustentável” ne’ebé sei hatan diretamente ba prioriedade no konsentrasaun Governu nian, hahú kedas hosi aprezentasaun VNR iha tinan 2019, TL implementa ona polítika kompreensivu sira hodi atinji ODS ho foku espesífiku ba hamenus disparidade entre rejiaun no grupu oi-oin iha sosiedade nian laran, iha tinan haat ikus ne’e, iha dezafiu boot ne’ebé aprezenta iha nível global no nasionál hosi pandemia Covid-19 nian, maibé TL bele halo medida hirak ne’ebé tuir tempu hodi hamenus impaktu negativu ba ema sira no identifika polítika sira nia rekuperasaun nian ne’ebé adekuadu, hodi koloka ema sira iha sentru dezenvolvimentu nian. Tanba ne’e importante atu dezenvolve VNR, hodi fahe koñesimentu TL nian ho públiku internasionál no uza rezultadu sira hosi elaborasaun polítika VNR nian. Parteinteresada sira hotu nia envolvimentu iha VNR ne’e hetan korajen.
Alende ne’e, iha eventu ne’e halo mos aprezentasaun hosi Tékniku PME, ANAPMA kona-bá Introdusaun Revizaun Nasionál Voluntária TL daruak (RNV 2.0) no Relevánsia Polítika nomos hosi parte Estatístika nian kona-bá Importánsia Meta ODS nian TL, Disponibilidade Dadus no Avaliasaun Progresu bazea ba Evidénsia.
Enkuantu rezultadu hosi VNR ne’e, sei aprezenta iha Forum Polítiku Nível Aas Nasoens Unidas nian, iha Nova Iorque iha fulan Jullu tinan 2023, kona-bá Dezenvolvimentu Sustentável.
Fahe ba Sosial Media:
