Ainaro, 10/02/2023, I Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, partisipa iha seremónia inaugurasaun sistema bee moos iha aldeia Hatusau, suku Horai-Quic, postu-administrativu Maubisse, munisípiu Ainaro.
Iha intervensaun I Vise-Prezidente KE BTL, E.P agradese ba parseiru CVTL no parseiru sira seluk ne’ebé apoia ona governu ou bele hatutan governu nia liman ain, hodi kanaliza bee ba komunidade sira iha área rurál. Tanba ne’e, Ezekutivu husu ba autoridade lokál ho komunidade sira, atu tau matan fasilidade sira no kuidadu mos bee matan ou konserva bee, liuhosi kuda ai ne’ebé bele dada no proteje bee matan, nomos labele oho aninál sira iha bee laran hanesan tuna, atu nune’e bele asegura bee ou bee labele maran.
I Vise-Prezidente KE BTL, E.P mos apresia no fó parabens ba Grupu Maneja Fasilidade (GMF) ne’ebé iha ona fundu inisia, hodi prepara ba manutensaun sistema refere no husu ba komunidade sira atu fulan-fulan, bele kontribui sentavos 25 ou 50 (sentavos $ 0,25 ou 0,50), atu hadi’a sistema bee moos ne’e wainhira aat, maibé BTL, E.P nafatin prontu hodi apoia, wainhira presiza, nune’e bele funsiona nafatin sistema bee refere.
Reprezentante MOP hatete, programa ida ne’e, polítika hosi Ministériu Obras Públikas (MOP) nian, ne’ebé servisu hamutuk ho BTL, E.P no ANAS, I.P oinsá atu aselera prosesu dezenvolvimentu, liu-liu liuhosi bee moos. Alende ne’e, Gabinete MOP mos servisu hamutuk ho IPG halo perfurasaun no CVTL kontinua hodi kanaliza bee iha aldeia refere. Gabinete MOP mos odamatan nafatin nakloke hodi apoia programa hosi parseiru sira, nune’e bele kanaliza bee komunidade sira.
Iha fatin hanesan, Prezidente Interinu CVTL agradese ba Gabinte MOP no BTL, E.P nia apoiu makaas, oinsá bele kanaliza bee moos mai iha fatin ne’e, nomos IPG no parte sira seluk nia apoiu. Enkuantu orsamentu hodi finansia ba sistema bee moos ne’e, CVTL hetan apoiu fundus hosi Cruz Vermelha Itália ho montante $ 9,894.25 no apoia mos hosi VIII Governu Konstitusionál liuhosi Gabinete MOP nian, hamutuk $ 2,514.15 nomos kontribuisaun hosi komunidade sira. CVTL iha inisiativa hodi mellora no kanaliza bee ba aldeia ne’e, tanba hetan pedidu hosi komunidade sira ih aldeia Hatusau ne’e. Maibé CVTL labele la’o mesak, tanba ne’e CVTL husu apoiu fundus hosi parseiru no Governu (MOP).
Alende ne’e, agradese mos ba apoia no esforsu tomak hosi enjeñeiru BTL, E.P nian, ne’ebé bele halo ona levantamentu tékniku (survey) no ikus mai CVTL kontinua hodi servisu hamutuk ho komunidade no OPS iha suku ne’e, atu oinsá mak bele alkansa objetivu ida, hodi dada bee hosi foho lolon, mai iha aldeia Hatusau, durante kooperasaun servisu iha terrenu, konsege kanaliza bee ho susesu, finalmente ohin bele hakat ba faze inaugurasaun.
Durante iha seremónia inaugurasaun ne’e, CVTL husu ba komunidade sira atu kuida sistema bee refere ho di’ak, atu nune’e bele uza ba nesesidade lor-loron nian, nune’e moras diárea no kulit labele kona komunidade sira. Nomos kuidadu sistema ne’e, atu nune’e jerasaun sira tuir mai bele uza mos sistema bee refere.
Sekretária Adjunta Munisípiu Ainaro, agradese ba CVTL nia esforsu ne’ebé servisu hamutuk ho Governu (MOP) tanba bele tulun ona, hodi kanaliza bee moos ba komunidade sira iha aldeia Hatusau, suku Horai-Quic no husu ba komunidade atu kuidadu bee ne’e ho di’ak nune’e bele uza ba tempu naruk.
Parte seguransa (PNTL) mos rekomenda ba lideransa komunitária no komunidade sira, atu uza bee ne’ebé hanesan, katak wainhira uza hotu presiza taka bee, atu komunidade sira seluk bee uza fali, nune’e labele hamosu problema, tanba dala barak akontese problema tanba komunidade sira hadau malu bee moos no bee la to’o ba komunidade seluk, ikus mai monu problema, tanba ne’e tenke uza ho konsiénsia atu ema hotu bele hetan bee moos.
Enkuantu sistema bee moos ne’e benefisia ba uma kain 49 ho totál populasaun 279 ne’ebé hela iha aldeia Hatusau, suku Hora-Quic, Ainaro.
Partisipa iha seremónia inaugurasaun bee moos, mai hosi parte MOP, BTL, E.P Nasionál no Munisípiu Ainaro, ANAS, I.P, CVTL, Plan International, Mercy Corps, Care Internacional, Autoridade munisípiu Ainaro, parte Seguransa PNTL, Lideransa Komunitária suku no aldeia, komunidade no konvidadus sira seluk.
Fahe ba Sosial Media:
