Díli, 25/01/2023, I Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, akompaña hosi Diretór Diresaun Operasionál no Manutensaun (DOM) ho Ofisiál Saneamentu O&M, partisipa iha Workshop Avaliasaun Nasionál Programa ALFA (Área La Soe Fo'er Arbiru). Atividade ne'e realiza iha Salaun Enkontru CNE, Colmera.
Objetivu hosi workshop ne’e, hodi hasa’e kobertura saneamentu no hatun ou hamenus moras sira relasiona ho saneamentu, nomos hodi hatene progresu ba implementasaun programa ALFA, iha Timor-Leste, dezafiu no dalan ba futuru (ba oin) kona-bá saneamentu no ijiéne.
Entretantu programa ALFA ne’e, Governu Timor-Leste liuhosi Ministériu Saúde (MS) ne’ebé durante ne’e, servisu hamutuk ho Ajénsia ou Parseiru internasionál sira hanesan Unicef, WaterAid, Plan International, OMS, NGO Lokál no entidade relevante sira, implementa ona iha aldeia balun ne’ebé lokaliza iha munisípiu sira, iha Territóriu Nasionál, maibé iha aldeia balun seidauk bele deklara programa ALFA. Tanba ne’e, entidade relevante sira presiza servisu hamutuk hodi konsiensializa komunidade sira, atu moris ho ijiéne no labele soe fo’er boot arbiru, katak tenke soe fo’er ho loloos, liuhosi uza sentina, bele mos deklara tan programa ALFA.
Programa ALFA katak ema labele soe fo’er arbiru, maibé realidade komunidade balun nafatin seidauk iha konsiénsia hodi soe fo’er ho loloos, balun mos sei uza sentina ne’ebé mak tradisionál liu, tanba ne’e liuhosi kooperasaun servisu hosi parte hotu-hotu, hodi hasa’e komunidade nia sira konsiénsia, hodi prátika saúde ne’ebé di’ak, liu-liu saúde públiku, atu nune’e labele fó impaktu ba ema nia saúde.
Nune’e mos tuir planu Unicef nian katak, sei hasa’e númeru utilizasaun saneamentu báziku iha tinan 2024 nia rohan, signifika parte hotu presiza servisu makaas, ativu no halo akompañamentu ne’ebé di’ak, hodi konstroi sentina ne’ebé ho dignu ba komunidade sira, nune’e iha finál tinan 2024 bele atinji metas 100% kona-bá saneamentu báziku katak, komunidade hot-hotu bele asesu ona ba sentina, hodi deklara programa ALFA.
Alende ne’e, atu atinji metas ida katak to’o tinan 2024 aldeia hotu-hotu iha Territóriu Nasionál bele iha sentina no bele deklara ona ALFA, presiza kooperasaun servisu hosi Ministériu relevante sira hanesan MOP, MAE nomos Prezidente Autoridade, Administradór postu-administrativu, lideransa suku no aldeia, atu bele esforsu hamutuk, hodi servi komunidade, atu bele deklara programa ALFA iha aldeia sira ne’ebé seidauk implementa programa ne’e, iha tempu tuir mai, hein katak to’o tinan 2024 bele muda komunidade sira nia konsiénsia, hodi soe fo’er ho loloos.
Enkuantu iha Polítika Nasionál tinan 2012 nian, ne’ebé ko’alia kona-bá Saneamentu Báziku ou programa ALFA, ne’ebé involve hosi Ministériu barak, Ajénsia Internasionál no ONG Nasionál, hodi introduz no implementa programa ALFA, ne’ebé implementa ona durante tinan 10 nia laran, konsege rejista ona aldeia balun iha Timor laran mak iha kondisaun sentina ne’ebé mak di’ak.
Workshop ne’e realiza durante loron rua, alende ne’e iha mos aprezentasaun hosi MS liga ba saúde públika no aprezentasaun hosi parseiru internasionál sira kona-bá planu programa ALFA, no kobertura ALFA hosi munisípiu 12 no RAEOA.
Atividade workshop ne’e, organiza hosi Ministériu Saúde (MS) liuhosi kooperasaun servisu ho parseiru internasionál Unicef, WaterAid no Plan International. Entidade sira ne’ebé partisipa iha atividade mai hosi MOP (ANAS, I.P), MAE, ONG lokál no ekipa hosi munisípiu no RAEOA.
Fahe ba Sosial Media:
