Covalima, 24/01/2024, Enjeñeiru hosi Departamentu Infraestrutura akompaña hosi Supervisor no Koordenadór Bee Timor-Leste, Empreza Públika (BTL, E.P) munisípiu Covalima, iha loron 17 fulan ne'e, halo monitorizasaun ba projetu pakote fornesimentu no instalasaun prefabricated liner tank no projetu konstrusaun sistema fornesimentu bee moos ne'ebé implementa hela iha postu-administrativu Fohorem, munisípiu Covalima.
Monitorizasaun ne'e, hodi haree direta obra fíziku iha terrenu no atu bele hatene progresu hosi projetu ne'e rasik, nune'e mos hodi garante kualidade projetu, nune'e wainhira finaliza, bele dura to'o tempu naruk.
Relativamente ba rezultadu monitorizasaun nian katak, daudaun ne'e, projetu fíziku kona-bá pakote fornesimentu no instalasaun prefabricated liner tank nian atinji ona pursentu 100 (100%), obra refere ezekuta hosi kompañia Azra Unip Lda ho durasaun tempu fulan neen.
Enkuantu servisu fíziku kona-bá projetu konstrusaun sistema bee moos iha Fohorem nian, foin mak atinji pursentu 25 (25%) no implementa hosi kompañia Roman Junior Unip Lda, ho durasaun tempu fulan neen.
Projetu rua ne'e, wainhira finaliza, sei fornese bee moos ba komunidade no ba instituisaun Estadu balun iha postu Fohorem.
Alende ne'e, Tuir planu, projetu sistema bee moos ne'ebé BTL, E.P promove iha postu-administrativu sira, sei ho sistema urbana, iha ne'ebé sei kanaliza bee direta ba populasaun sira nia hela fatin no instala mos metru kontadór ba uma kain ida-idak.
Fahe ba Sosial Media:
