Díli, 15/11/2022, I Vise-Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Sr. Gustavo da Cruz, partisipa iha Steering Committee Meeting ba dala-ikus, kona-bá Bee ba Fetó (Water for Women) ne’ebé realiza hosi Care International iha Timor-Leste (TL) no WaterAid Timor-Leste (WATL), iha otél JL Villa, Fatuhada, Díli.
Objetivu hosi Steering Committee Meeting ne’e, hodi atualiza rezultadu hosi atividade sira durante iha fulan neen nia laran, ba partisipante relevante sira ou membru steering group, tantu governu no ONG, nune’e sira bele fó komentáriu no susjestaun ruma ligadu ho atualizasaun rezultadu servisu kona-bá “Bee ba Feto”, nune’e bele rezolve kestaun balun ne’ebé mak seidauk realiza, atu implementa fila-fali iha futuru.
Durante iha Steering Committee Meeting ne’e, iha mos aprezentasaun hosi WaterAid TL no Care International TL kona-bá saida mak sira apreende, susesu, no challenge ou dezafiu ne’ebé sira enfrenta durante fulan neen nia laran, durante implementasaun projetu Bee ba Feto, iha munisípiu Liquiça no Manufahi, nune’e membru steering group ou entidade sira ne’ebé partisipa iha Steering Committee Meeting ne’e, bele fó komentáriu, sujestaun relasiona ho aprezentasaun refere.
Hafoin aprezentasaun, liuhosi komentáriu, I Vise-Prezidente K.E BTL, E.P agradese ba susesu no progresu ne’ebé WATL no Care International atinji ona durante ne’e, kona-bá projetu Bee ba Feto. Ezekutivu ne’e mos apresia ba advokasia ne’ebé WATL no Care International halo ona ba komunidade sira, nune’e sira bele utiliza fasilidade hirak ne’ebé mak governu no parseiru sira fornese ona ou eziste ona iha sira-nia munisípiu.
BTL, E.P mos sujere ba ANAS, I.P no WaterAid atu haree didi’ak kona-bá guide line ba suku ijiéne, tamba guide line ba téknika nian, ANAS, I.P mak lidera hela no daudaun ne’e iha hela faze implementasaun halo ona treinamentu la’ós de’it ba SMASA maibé ba mos enjeñeiru ou tékniku PNDS nian.
Alende ne’e, Ezekutivu BTL, E.P sita mos asuntu kona-bá kooperasaun entre parseiru sira ho BTL, E.P hodi halo sosializasaun ou diseminasaun ba dekretu lei ba komunidade sira, kona-bá aplikasaun selu tarifa bee, nune’e ezisténsia BTL, E.P ba tinan rua ne’e, aplika ona selu tarifa bee ba komunidade iha munisípiu sira, nune’e iha konstribuisaun hatudu ho signifikante, tamba ne’e, sosializasaun ba dekretu lei hirak ne’e importante tebes.
Nune’e mos parte BTL, E.P nafatin husu ba parseiru sira iha munisípiu atu kolabora, tamba iha kapitál postu-administrattivu sira mos daudaun ne’e BTL, E.P promove ona projetu Sistema bee rurál ba Sistema bee urbana, tuir dekretu lei nú. 4/2004 katak área urbana mak to’o ba iha kapitál postu-administrativu sira.
Alende komentáriu hosi BTL, E.P, iha sujestaun no komentáriu balun hosi membru steering group sira seluk hanesan ANAS, I.P, Rede Feto, Ministériu Saúde, SEII, ADTL no DFAT, ligadu ho aprezentasaun ne’ebé mak parte WaterAid no Care International kona-bá Bee ba Feto.
Enkuantu, Prezidente Konsellu Diretoria Rede Feto Timor-Leste (TL), Zélia Fernandes hatete, persiza investe makaas liu tan iha setór bee, ne'ebé konsidera importante tebes, tamba atividade hot-hotu presiza bee, alende ne’e, bele hakmaan mos inan no oan feto sira-nia servisu, tamba realidade inan no oan ou labarik feto mak sempre ba kuru bee, hodi uza ba nesesidade diária nian
Rede Feto TL sita mos kona-bá dekretu lei ba jestaun rekursu bee nian, tamba Rede Feto TL preokupa kona-bá atividade perfurasaun iha fatin-fatin, ne'ebé la’o hela iha terrenu, oinsá mak atu regulariza atividade perfurasaun bee ne’e rasik, tamba sira konsidera atividade perfurasaun ne’e mak kontinua sei fó ameasa ba sosiedade iha futuru, será que bee ne’ebé fura ne’e, bele konsumu ou labele, tamba haree mos ba fasilidade iha laboratóriu ne'ebé limitadu.
Hatan ba preokupasaun hosi Rede Feto TL nian, reprezentante Prezidente ANAS, I.P, Ofisiál Estratejia no Polítika ANAS, I.P, Juviana Jerónimo hatete, ANAS, I.P labele aplika regras ba atividade perfurasaun ne’e, tamba esbosu dekretu lei ne’ebé mak atu regula atividade hirak ne’e, seidauk hetan aprovasaun hosi governu, hein katak tinan oin Governu bele aprova ona esbosu dekretu lei refere, hodi regulariza atividade hotu kona-bá bee nian.
Iha fatin hanesan, Country Director Care International iha Timor-Leste, Peter Goodfellow, Care International agradese tamba hamutuk ho parseiru sira hodi implementa projetu ida ne’e. Care International hein katak parte hotu tantu Governu, sosiedade sivil no parseiru internasionál sira nomos asosiasaun feto nian iha TL, atu kontinua kolabora iha futuru, hodi haree ba populasaun sira-nia preokupasaun. Care International prontu wainhira iha oportunidade atu koopera hodi servisu hamutuk ho parseiru sira, kona-bá servisu ida ne’e nomos projetu seluk iha futuru.
Atu termina, Coutry Director WaterAid TL, Justino da Silva sente kontente no agradese ba membru steering group tantu hosi parte governu nian nomos ONG sira bele partisipa hodi fó opiniaun sira relasiona ho projetu sira implementa ona iha Liquiça no Manufahi.
Programa ou projetu Bee ba Feto, implementa hosi konsórsiu ou servisu hamutuk entre WaterAid TL no Care International iha TL, hetan fundus hosi governu Austrália, liuhosi parseiru DFAT no projetu ne'e implementa ona iha munisípiu rua, hanesan munisípiu Manufahi no Liquiça, durante tinan lima.
Entidade sira ne’ebé partisipa iha Steering Committee Meeting ne’e mak reprezentante hosi Embaixada Austália liuhosi parseiru DFAT, BTL, E.P, ANAS, I.P, SEII, Ministériu Saúde, Rede Feto TL no ADTL.
Fahe ba Sosial Media:
