Díli, 13/01/2023, I Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) partisipa iha seremónia “Lansamentu Brigada” ne’ebé lansa diretamente hosi Ministru Obras Públikas (MOP), S.E Eng. Abel Pires da Silva. No seremónia ne’e, realiza iha Kampaun, edifísiu Institutu Jestaun Ekipamentus no Apoiu ba Dezenvolvimentu infraestrutura, Institutu Públiku (IGEADI, IP, sigla portugés), Colmera.
Hafoin lansamentu ne’e, Xefe Brigada ho ekipa sei hala’o knaar importante sira ho responsabilidade, loloos no lalais, hanesan hodi halo atuasaun ba dezastre ruma ne’ebé akontese no pedidu urjénsia hosi komunidade sira. Alende ne’e, hodi halo intervensaun imediata ba manutensaun kiik sira, hanesan estrada nasionál liu-liu estrada iha kapitál Díli, nomos halo intervensaun ba irigasaun sira ne’ebé hetan estragus hosi dezastre naturais.
Antes ne’e, brigada hirak ne’e tau naran brigada I to’o VI, maibé daudaun ne’e troka fila-fali ba eroi no eroína sira nia naran, hanesan Brigada Daitula, Rosa Muki, Maria Tapo, Samba 9, Sebastião Gomes no ikus liu ekipa TF Operasionál. Ho naran foun Eroi no Eroína ne’e, bele apreende hosi sira nia dedikasaun, atu transforma sira nia dedikasaun ne’e, mai iha prosesu libertasaun foun ne’e, tanba ne’e wainhira ko’alia kona-bá dezenvolvimentu no ba libertasaun povu, mak presiza dezenvolve iha área tolu, hanesan estrada, ponte, bee moos no eletrisidade, tanba ne’e presiza banati tuir Eroi no Eroína sira nia espíritu dedikasaun no sakrifísiu hodi liberta povu ba moris di’ak.
Partisipa iha seremónia lansamentu ne’e, maihosi MOP, BTL, E.P, ANAS, I.P, EDTL, E.P, ANE, I.P no funsionáriu hosi IDEDI, E.P rasik.
Fahe ba Sosial Media:
