Díli, 14/12/2022, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Eng. Carlos Peloi dos Reis hamutuk ho I Vise-Prezidente KE BTL, E.P Sr. Gustavo da Cruz, partisipa iha eventu enseramentu projetu “Bee ba Feto” (Water for Women) iha Timor-Leste (TL). No eventu ne’e rasik organiza hosi WaterAid Timor-Leste (WATL) no parseiru implementadór sira inklui parseiru konsórsiu Care International Timor-Leste (TL), ne’ebé realiza iha otél City8, Has-Laran, Manleuana.
Objetivu hosi eventu ne’e, hodi ensera programa ou projetu “Bee ba Feto” (Water for Women) ne’ebé durante ne’e, konsórsiu entre WATL no Care International TL, hamutuk ho parseiru implementadór lubuk ida, realiza ou implementa ona, durante tinan lima, iha Timor-Leste (TL).
Country Director WATL rekoñese iha implementasaun projetu ne’e, iha mudansa di’ak no balun iha fallansu, nune'e iha lisaun barak mak aprende ho parseiru sira, durante realizasaun programa refere, maske nune’e, sente orgullu tanba atinji ona susesu lubuk ida, durante kooperasaun servisu iha tinan lima nia laran, liu-liu iha Manufahi no Liquiça.
Country Director WATL hatete implementasaun projetu “Bee ba Feto” ne’e, konsórsiu entre WATL no Care International TL maibé iha mos parseiru implementadór lubuk ida, hanesan FLF, FHTL, PN-BESI, RHTO, Asosiasaun HAK, Grupu FFTL, Organizasaun FAS Feto Enjeñaria nomos Asosiasaun GMF munisípiu Manufahi no Liquiça, enkuantu parseiru estratéjiku no parseiru xave hodi fó apoiu ba parseiru implementadór sira mak, Administradór Manufahi no Liquiça, servisu munisipál sira, MS, ME, SMASA, SEII, Administradór postu nomos líder komunitária sira, ne’ebé fó apoiu ba iha nível implementasaun inklui BTL, E.P iha nível munisípiu. Enkuantu iha nível nasionál WATL koopera besik liu ba MOP liu-liu ho ANAS, I.P no BTL, E.P Nasionál.
Atu konklui intervensaun, Country Director WATL agradese ba kooperasaun tomak ba periodu ida nian, tantu parseiru estratéjiku governu nian nomos ONG sira. Alende ne’e, WATL hato’o mos agradesimentu ba Embaixada Austrália ne’ebé apoiu ona fundus, hodi implementa projetu “Bee ba Feto” (Water for Women), durante tinan lima no agradese mos ba apoiu estensaun programa refere ba tinan rua nian.
Iha biban ne’e, Reprezentante Embaixadór Austrália iha TL, sente kontente tanba bele partisipa no orgullu hodi selebra susesu hosi projetu “Bee ba Feto” (Water for Women). Austrália orgullu tebes, hodi fó apoiu ba projetu “Bee ba Feto” iha TL durante tinan lima nia laran. Nune’e mos hato’o parabens b aba ekipa hotu ne’ebé hola parte, hodi implementa projetu refere.
Enkuantu Projetu “Bee ba Feto” (Water for Women) hetan apoiu fundus hosi Embaixada Austrália, ho montante Dolar Australianu kuaze milloens neen (kuaze $ 6 milhoens), durante tinan lima, no projetu refere remata iha fulan dezembru tinan 2022 ne’e. Alende ne’e, projetu fíziku hosi programa “Bee ba Feto” durante ne’e, implementa ona iha munisípiu rua, hanesan munisípiu Liquiça no Manufahi nomos advokasia ne’ebé hala’o iha nível nasionál, liu-liu iha setór BESI (Bee, Saneamentu no Ijiene) no governu.
Entretantu programa “Bee ba Feto” (Water for Women) ne’e, sei entende tan ba tinan rua, tanba ne’e, WATL sei kontinua programa refere, iha tinan oin (2023) no durante tinan rua ne’e, sira sei foka liu ba programa BESI liga ho mudansa klimátika ho aproximasaun advokasia iha nível nasionál no sei espanda ba iha fatin seluk.
Molok ensera atividade ne’e, ekipa WATL no parseiru implementadór akompaña partisipante sira, hodi vizita stand hirak ne’ebé prepara ona iha resintu City8, oinsá bele haree relatóriu ou rezultadu servisu hodi fahe aprendizajen no prátika di’ak sira hosi projetu “Bee ba Feto” ne’ebé implementa ona hosi WATL hamutuk parseiru konsórsiu Care International TL no parseiru ONG lokál lubuk ida, durante tinan nia laran, iha TL.
Fahe ba Sosial Media:
