Díli, 15/11/2024. Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, akompaña hosi Vise-Prezidente KE BTL, E.P ba Asuntu Tékniku, Sr. José Filipe Ximenes Smith no Vise-Prezidente KE BTL, E.P ba Asuntu Korporativu, Sra. Elizabeth Amaral konvoka reuniaun ho Diretór no Jestór sira, iha salaun enkontru edifísiu sentrál BTL, E.P, Caicoli.
Objetivu hosi reuniaun ne’e, hodi fó orientasaun ba kargu xefia sira, liu-liu ba Diretór Operasaun no Manutensaun (DOM), Diretór Administrasaun no Finansas (DAF) nomos Diretór Enjeñaria no Investimentu (DEI) atu kontinua ezekuta, intensifika no aselera servisu sira liga ba sistema bee iha terrenu.
Iha parte Operasaun no Manutensaun nian, Prezidente KE BTL, E.P husu ba Diretór O&M atu hahú aselera servisu operasionál sira no halo intesifikasaun ho rekursu ne’ebé mak iha hodi bele halo melloramentu sistema bee, iha kapitál Díli nomos munisípiu sira.
Alend ne’e, ba Diretór A&F atu haree kona-bá lojístika nian nomos maximiza atendimentu públiku ou kliente, hodi bele hasa’e reseitas.
Ba parte investimentu nian, Ezekutivu ne’e husu ba Diretór E&I atu halo akompañamentu ba projetu ongoing sira ne’ebé maihosi mandatu dahuluk nian, hodi nune’e bele aselera lalais obra fíziku iha terrenu. Liga projetu ongoing hirak ne’e, Prezidente KE BTL, E.P bolu atensaun no fó prazu to’o tinan oin, iha trimestre dahuluk nian, projetu hotu-hotu tenke finaliza ona.
Fahe ba Sosial Media:
