Díli, 17/07/2024. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Jestór Operasaun no Manutensaun (JOM) Sr. Eduardo Ximenes ho ekipa halo monitorizasaun ba servisu instalasaun sistema bee emerjénsia sira, iha kapitál Díli.
Atividade monitorizasaun ne’e, hodi observa direta servisu fíziku iha terrenu, atu nune’e hodi hatene progresu servisu hosi obra ne’e rasik.
Ohin Vise-Prezidente KE BTL, E.P ho ekipa hahú monitoriza servisu instalasaun liña distribuisaun iha Manleuana no kontinua ba área Raikotu no ikus liu observa mos sistema bee iha Aimutin.
Durante observasaun servisu melloramentu iha terrenu, Vise-Prezidente KE BTL, E.P ba Asuntu Sistema Bee, Saneamentu no Drenajen nafatin enkoraja tékniku sira no solisita atu bele aselera servisu fíziku, hodi nune’e bele kanaliza bee ba abitante sira. Maibé Ezekutivu ne’e mos husu ba ekipa BTL, E.P atu kuidadu aan ou tenke tau importánsia ba seguransa pesoál, durante hala’o servisu iha terrenu.
Enkuantu servisu instalasaun sistema bee iha fatin hirak ne’e paralelu ho projetu konstrusaun no alargamentu estrada inklui drenajen sira, nune’e wainhira kompañia konstrutór sira nahe estrada no konstroi drenajen, ekipa BTL, E.P kontinua instala kedas kanu distribuisaun sira iha estrada ninin no valeta sorin, atu nune’e ba futuru labele ke’e tan estrada no instalasaun liña distribuisaun hirak ne'e sei utiliza atu fornese bee ba abitante sira ba longu prazu.
Alen de ne’e, durante iha servisu alargamentu estrada no konstrusaun drenajen ne’e mak ke’e estraga kanu sira, kompañia sei koordena ho BTL, E.P, hodi tékniku sir abele hadi’a kedas estragu sira.
Fahe ba Sosial Media:
