Díli, 22/09/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis, akompaña hosi I Vise-Prezidente Komisaun Ezekutiva (K.E) BTL, E.P hala’o enkontru ho delegasaun Japaun, hosi kompañia CWP Global, LTD no kompañia Kanse, hosi Ono City. Enkontru ne’e, realiza iha salaun enkontru Ezekutivu, edifísiu sentrál BTL, E.P, Caicoli.
Objetivu hosi enkontru ne’e, hodi introduz sira-nia prezensa mai iha BTL, E.P, tamba tuir sira BTL, E.P mak empreza ne’ebé responsabiliza ba bee moos no saneamentu, nune’e delegasaun refere hakarak hasoru no ko’alia ho BTL, E.P.
Delegasaun ne’e sei dezloka ba Urahou, munisípiu Ermera, hodi haree sira-nia obra instalasaun sistema bee moos ne’ebé instala antes ona, iha fatin ne’e, liuhosi kooperasaun ho Unicef iha TL no vizita ba Urahou, sira sei hala’o mos atividade balun, iha fatin refere.
Delegasaun ne’e mai TL, tamba sira iha kooperasaun servisu ho Unicef iha TL, kona-bá instalasaun sistema bee, hodi distribui bee ba komunidade sira nomos atividade fase liman ba eskola, iha Urahou, ho nune’e sira mai, hodi haree fila-fali sira nia fasilidade ne’ebé sira apoiu, iha fatin ne’e.
Perante iha enkontru ne’e, delegasaun ne’e mos hato’o sira-nia prontidaun, hodi apoia ba iha setór bee no saneamentu, liu-liu iha área treinamentu ou kapasitasaun ba enjeñeiru sira, alende ne’e, sira mos ba bee hodi transforma sistema bee iha área rurál sira, iha posibilidade hodi bele hadi’a di’ak liu tan kualidade sistema bee.
Delegasaun ne’e nia prezensa iha Timor-Leste (TL), liuhosi esforsu Embaixadór TL iha Japaun, nune’e ekipa refere hodi to’o iha TL, hodi hala’o sira-nia misaun iha TL nomos bele hasoru malu ho BTL, E.P.
Fahe ba Sosial Media:
