Ataúro, 23/11/2022, Ekipa Task Force (T.F) Bee Timor-Leste, Empreza Públika (BTL, E.P, hamutuk ho ekipa BTL, E.P Ataúro no funsionáriu munisípiu Ataúro halo manutensaun ba kanu transmisaun bee DN 100, hosi Bee Rau to’o Villa Maumeta, munisípiu Ataúro.
Kanu transmisaun ne’ebé kotu ne’e, kauza hosi udan boot, nune’e rai mamar, hodi provoka fatuk monu hosi foho leten kona kanu refere, nune’e rezulta kanu kotu, hodi afeta direta ba distribuisaun bee ba rezervatóriu, nune’e ekipa Task Force BTL, E.P mobiliza materiál no tun kedas ba terrenu, hodi halo intervensaun ba estragus refere.
Iha imajen hatudu, tékniku sira tula jeradór iha bero, lori ba lokál servisu nian, nune’e bele utiliza hodi solda kanu ne’ebé kotu no tuir informasaun hosi terrenu katak, fatin ou lokál ne’ebé kanu distribuisaun kotu ne’e, lokaliza iha foho leten, nune’e mos distánsia hosi kanu transmisaun to’o rezervatóriu kuaze kilómetru tolu (3).
Alende ne’e, maske fatin ne’e perigu tebes ba ema nia vida, maibé tékniku sira nafatin ho vontade tomak no esforsu to’o iha fatin ne’e, hodi hadi’a kanu refere, nune’e bele garante abastesimentu bee ba komunidade sira ne’ebé durante ne’e asesu bee hosi liña transmisaun ne’e.
Fahe ba Sosial Media:
