Díli, 01/02/2023, Ekipa hosi Diresaun Enjeñaria no Investimentu (DEI), Bee Timor-Leste, Empreza Públika (BTL, E.P) ohin lori kompañia manan na’in ba observa no hatudu fatin kona-bá projetu Pakote Konstrusaun Sistema Bee Moos no Supply & Installation Liner Tank, iha suku Vila Verde, postu-administrativu Vera Cruz, munisípiu Díli.
Hafoin ekipa DEI BTL, E.P hatudu tiha fatin ba kompañia implementadór ne’e, kompañia rasik promete iha semana ida nia laran, kompañia sira hahú mobiliza materiál, hodi hahú hala’o servisu iha fatin refere.
Durante observasaun iha terrenu, akompaña mos hosi xefe aldeia Mate Moris nomos rai na’in ne’ebé mak oferese rai hodi instala ou monta tanke rezervatória no sira koopera di’ak ho ekipa DEI BTL, E.P no kompañia manan nain ba projetu ne’e.
Enkuantu projetu Pakote Konstrusaun Sistema Bee Moos no Supply & Installation Liner Tank ne’ebé kompañia Arlei Henlice Unipessoal Lda sei implementa ne’e ho durasaun tempu fulan neen. No orsamentu ne’ebé sei gasta ba projetu refere hamutuk $ 86,392.40. Projetu ne’e rasik sei hahú hosi instalasaun kanu transmisaun no distribuisaun inklui monta mos tanke rezervatóriu bee ho medida diámetru 90m3.
Alende ne’e, Sistema Bee Moos ne’ebé sei kanaliza ba komunidade sira ne’e, mai hosi sistema bomba ne’ebé nia perfurasaun finaliza ona. No perfurasaun bomba refere nia fundus mai hosi liña ministeriál sira no orsamentu ba konstrusaun moru protesaun iha bomba ne’e rasik mai hosi Fundus Infraestrutura. Ho nune’e, kompañia sei utiliza bomba refere, hodi kanaliza ba komunidade sira iha suku Villa Verde.
Projetu Pakote Konstrusaun Sistema Bee Moos ne’e, sei benefisia ba komunidade uma kain rihun tolu resin ho nia populasaun 15.344, ne’ebé mai hosi aldeia sia hanesan Guideon, Lemorai, Matua, Mate Moris, Mate Resto, Nopen, Terus Nain, 01 de Setembro no Virgolosa, suku Villa Verde, postu-administrativu Vera Cruz, munisípiu Díli.
Fahe ba Sosial Media:
