Liquiça, 17/12/2022, Ekipa hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) Nasionál akompaña hosi ekipa BTL, E.P munisípiu Liquiça, hahú hosi loron 12 to’o loron 14 fulan dezembru tinan ne’e, halo levantamentu dadus ba bee matan, hodi fornese ba komunidade sira, iha suku Leorema, munisípiu Liquiça.
Objetivu hosi atividade levantamentu dadus ne’e, hodi akumula dadus sira hotu, liu-liu hanesan rekursu bee ou bee matan sira, iha área ne’e, hodi hatene débitu bee iha bee matan ne’e, hafoin sei halo análize hidrólika, halo dezeñu no hodi prepara mos BoQ, atu bele prepara ba nia implementasaun iha munisípiu refere.
Molok tun ba terrenu, ekipa D.E.I hala’o uluk enkontru ho Autoridade lokál sira, hodi koordena no introduz prezensa ekipa BTL, E.P nian iha fatin ne’e no informa mos planu servisu BTL, E.P nian ne’ebé sei implementa iha suku refere. Durante iha enkontru ne’e, autoridade lokál sira kontente no apresia tebes ba programa BTL, E.P, liu-liu kona-bá kompañia H20 ne’ebé BTL, E.P kontrata hodi halo perfurasaun bee iha fatin refere ho susesu no bee nia débitu 12 litru por segundu (12 L/S).
Alende ne’e, kipa DEI relata katak, BTL, E.P planea ona hodi utiliza perfurasaun bee refere, hodi kanaliza ba komunidade sira iha Leorema.
Iha biban ne’e mos, ekipa DEI BTL, E.P halo survey ba bee matan seluk, ne’ebé lokaliza iha suku Leorema ne'e rasik, hodi garante fornesimentu bee iha futuru.
Entretantu kona-bá transformasaun sistema bee hosi rural ba urbana, xefe suku Leorema pronto hodi halo tranformasaun refere.
Enkuantu atividade survey iha suku Leorema ne’e, akompaña hosi xefe aldeia Orluli nian, hodi hatudu rekursu bee ne’ebé mak lokaliza iha suku ne’e.
Fahe ba Sosial Media:
