Díli, 27/06/2022. Diretór Diresaun Operasaun no Manutensaun (D.O.M) hamutuk ho ekipa hala’o sosializasaun kona-bá selu tarifa bee, regras sira oinsa atu rejistu no halo ligasaun bee moos foun ba komunidade sira nia hela fatin, atividade sosializasaun ne’e realiza iha Suku Fatuhada, iha área Lurumata.
Ekipa BTL, E.P liu husi D.O.M sosializa informasaun ne’e, atu fasilita komunidade sira, hodi entende ho nune’e komunidade sira bele mai halo rejistu iha edifísiu BTL, E.P, wainhira komunidade sira iha inisiativa mai rejistu ona iha BTL, E.P, ida ne’e konsidera sai ona kliente, ho nune’e maka tékniku husi D.O.M, sei ba halo ligasaun bee moos foun ba komunidade sira ne’ebé rejistadu ne’e nia uma.
Aleinde ne’e, liu husi atividade sosializasaun ne’e, bele esplika mós informasaun relasiona ho servisu BTL, E.P nian, nune’e ekipa tékniku sira tun ba terrenu, hodi halo melloramentu no komunidade sira bele kolabora.
Iha oportunidade ne’e, Xefe Aldeia Zero III no Xefe Aldeia Zero V, ne’ebé maka partisipa mós iha sosializasaun ne’e, espresa mós sentimentu ne’ebé ho kontente no konsidera atividade ne’e, importante tebes tamba bee moos nu’udar nesesidade bazíku ba ema nia moris. Tamba ne’e, autoridade lokál husi aldeia rua ne’e, kompromete katak, wainhira tékniku sira halo servisu iha área refere, sei organiza povu di’ak liu tan, nune’e bele garante servisu la’o ho di’ak.
Iha parte seluk, autoridade seguransa, Ofisiais Polísia Suku ( OPS ) hato’o mós katak, parte seguransa prontu atu akompaña servisu sira ne’e, hodi asegura nafatin atividade iha terrenu, nune’e labele iha impedimentu ruma iha nia implementasaun servisu refere.
Antes ne’e, ekipa D.O.M hala’o ona sosializasaun, iha Aldeia Zero I, ne’ebé pertense ba suku fatuhada, postu-administrativu Dom Aleixo.
Fahe ba Sosial Media:
