Lautém, 16/08/2022, Atu garante kualidade obra ba projetu Melloramentu Sistema Bee Moos, mak iha loron 13 fulan agostu tinan ne’e, ekipa hosi Diresaun Enjeñaria no Investimentu (D.E.I) BTL, E.P nasionál, dezloka ba Lautém, hodi halo verifikasaun no monitorizasaun ba obra kona-bá projetu Melloramentu Sistema Bee Moos ne’ebé implementa hela, iha suku Mehara, postu-administrativu Tutuala, munisípiu Lautém.
Durante iha atividade monitorizasaun iha Mehara, ekipa D.E.I ne’ebé lidera hosi Pontu Vokál D.E.I BTL, E.P ne’e mos, akompaña kompañia sira, hodi monta V-Nocth, pipa Screen Johnson no nahe (cor ou fundisaun) control box ou kaixa kontrolu iha tanke filtrasaun bee nian.
Pontu vokál D.E.I ne’ebé reponsabiliza ba projetu melloramentu refere hatete, ekipa sira mos foti amostra kalkáriu ne’ebé belit iha bomba nomos bee ne’ebé enxe ona iha tanke, hodi sukat ou halo esperimentu ba amostra hirak ne’e, hafoin hetan rezultadu mak ekipa sei lori aimoruk hodi halo tratamentu ba kalkáriu no bee refere.
Alende ne’e, pontu vokál D.E.I mos informa, tuir observasaun iha terrenu katak, projetu Melloramentu Sistema Bee Moos, iha suku Mehara, fizikamente daudaun ne’e, atinji ona pursentu 75 (75%).
Atividade verifikasaun no monitorizasaun ne’e, hala’o durante loron tolu, hahú hosi loron 13-15 fulan agostu tinan ne’e, ba dala haat ona no atividade refere akompaña mos hosi ekipa BTL, E.P munisípiu Lautém no autoridade lokál sira.
Fahe ba Sosial Media:
