Covalima, 03/10/2022, Ekipa Bee Timor-Leste, Empreza Públika (BTL, E.P) Nasionál akompaña hosi ekipa BTL, E.P munisípiu Covalima, hahú iha loron 26 to’o loron 30 fulan setembru tinan ne’e, halo levantamentu dadus ba bee moos foun, iha postu-administrativu Fatumea no Fatululik, munisípiu Covalima.
Objetivu hosi atividade levantamentu dadus ne’e, hodi akumula dadus sira hotu, liu-liu hanesan rekursu bee ou bee matan sira, iha postu-administrativu rua ne’e, hodi hatene débitu bee iha bee matan ne’e, hafoin sei halo análize hidrólika, halo dezeñu no hodi prepara mos BoQ, atu bele prepara ba nia implementasaun.
Molok tun ba terrenu hodi foti dadus tékniku ne’e, ekipa D.E.I hala’o uluk enkontru ho Autoridade lokál sira, hodi koordena no introduz prezensa ekipa BTL, E.P nian iha fatin ne’e no informa mos planu servisu BTL, E.P nian ne’ebé sei implementa iha postu rua ne’e, ho introdusaun hosi ekipa BTL, E.P nian, autoridade lokál sira sente kontente, apresia no prontu atu koopera ho BTL, E.P, atu bele implementa iha sira-nia postu rua ne’e, hanesan postu-administrativu Fatumea no Fatululik.
Alende ne’e, sira mos introduz kona-bá planu BTL, E.P nian, atu transforma sistema bee rurál iha postu-administrativu sira ba iha sistema urbana, signifika katak komunidade uma kain ida-idak sei hetan torneira ida, nune’e hodi instala mos metru kontadór, atu nune’e bee bele sufisiente ba ema hot-hotu no hodi konstribui mos taxa ba kofre Estadu.
Atividade levatamentu dadus ne’e, akompaña mos hosi Koordenadór no tékniku operadór BTL, E.P munisípiu Covalima.
Entretantu planu implementasaun ba projetu Sistema bee moos iha postu-administrativu Fatumea sei benefisia ba komunidade 359, Enkuantu ba postu-administrativu Fatululik sei benefisia ba komunidade uma kain 800 nomos sei fornese ba infraestrutura públika sira ho sistema bee urbana.
Fahe ba Sosial Media:
