Liquiça, 23/08/2022, Ekipa hosi Diresaun Enjeñaria no Investimentu (D.E.I) BTL, E.P hala’o Site Visit ba projetu konstrusaun Sistema Bee Moos no Pakote Pre-Fabricated Liner Tank, iha postu-administrativu Maubara, munisípiu Liquiça.
Atividade site visit ne’e, durante loron rua, hahú hosi loron 22 to’o 23 fulan agostu tinan 2022 ne’e, ho objetivu maka ekipa D.E.I BTL, E.P akompaña no lori kompañia kuaze 30 ne’ebé partisipa iha prosesu tenderizasaun ne’e, hodi bá haree diretamente fatin ou lokál ba planu instalasaun liña transmisaun hosi bomba ba tanke no liña distribuisaun ba zona 3, iha postu-administrativu Maubara.
Tuir informasaun hosi ekipa D.E.I katak, sistema bomba refere , antes ne’e, fura ona hosi kompañia manan na’in balun no ikus mai, BTL, E.P mak kontinua fali hodi dada bee ba komunidade sira, iha munisípiu refere.
Molok tun ba terrenu, ekipa D.E.I BTL, E.P, ne’ebé akompaña husi koordenadór BTL, E.P Munisípiu Liquiça hala'o uluk enkontru, hodi koordena ho autoridade lokál sira, kona-bá fatin hirak ne'ebé identifika ona, atu implementa projetu no planu servisu ba futuru.
Molok remata enkontru, Administradór postu-administrativu Maubara no xefe suku sira apresia no sei koopera ho BTL, E.P ba implementasaun projetu ba sistema bee moos, iha postu-administrativu refere.
Entretantu atividade site visit ne’e, akompaña mos hosi reprezentante Administradór postu-administrativu Maubara nian, xefe suku sira nomos Koordenadór BTL, E.P Liquiça.
Fahe ba Sosial Media:
