Baucau,30 Juñu 2026 -Diretór Operasaun no Manutensaun (DOM) Aleixo Dos Santos, ofisiál Legál,Judisiariu BTL,E.P no Jestór DAK akompaña hosi Koordenadora BTL,E.P Munisípiu Baucau halo enkontru ho administrador postu administrativu Laga ho polisia eskuadra Postu Laga no mos autoridade komunitaria sira iha salaun edifisiu administrativu postu Laga nian.
Objetivu husi enkontru ne’e oinsa parte BTL,E.P ho Autoridade Lokal no polisia eskuadra postu administrativu Laga tur hamutuk hodi buka solusaun ba kazu asaltu no agresaun fízika hasoru funsionáriu BTL, E.P nain rua,iha postu referida.
Durante enkontru parte BTL ,E.P husu ba autoridade lokal iha postu administrativu Laga no polisia eskuadra iha postu refere atu hare no tau matan ba funsionariu nain rua ne’ebe destakadu iha postu ne’e hodi asegura,nune sira nain 2 bele kontinua halo servisu loke bee hodi fornese ba konsumidór sira iha postu refere ho kondisaun diak.
Iha okaziaun ne’e parte autoridade lokal no polisia eskuadra iha postu Laga mós informa sira prontu atu asegura funsionariu nain 2 iha fatin ne’e hodi bele halo servisu ho kondisaun diak.
Enkuantu tuir kronolojia ne’ebé relata hosi BTL, E.P Munisípiu Baucau katak, iha loron 24 fulan juñu tinan 2026 ne’e, tékniku operadór BTL, E.P ho naran João Castro ho Supervisor BTL, E.P nian ho naran Mariano Walter hala’o hela servisu lee metru kontadór iha terrenu (PA Laga) Zona 2, derepenti de’it, joven nain tolu tun bá asaltu sira nain rua no halo agresaun fízika hasoru tékniku operadór João Castro no balun uza fatuk tuda hosi dook.
Durante enkontru ne’e, parte Polisia eskuadra postu Laga esplika,kazu refere submete ona ba Ministériu Públiku, maibé sei hein mandadu kapturasaun hosi Tribunál, hodi bele kaptura suspeitu sira, nune’e bele prosesa sira tuir dalan legál.
Fahe ba Sosial Media:
