Aileu, 01/09/2022, Ekipa Bee Timor-Leste, Empreza Públika (BTL, E.P) ne’ebé lidera hosi Diretór Diresaun Operasionál no Manutensaun (D.O.M), Sr. João N. Piedade Bráz, hamutuk ho Ofisiál Apoiu Kliente, Sr João Paulo da Silva Cardoso no Jurista BTL, E.P Sr. Zeferino Rangel Gusmão Cachola, iha loron 31 fulan Agostu tinan ne’e, sosializa Dekretu Lei nú. 41/2020 de 25 de Setembro kona-bá “Kriasaun Bee Timor-Leste, Empreza Públika”, nomos Dekretu Lei no Diploma Ministeriál sira seluk ba Komunidade sira, iha munisípiu Aileu. No atividade sosializasaun ne’e rasik, realiza iha salaun enkontru Bombeiros, munisípiu Aileu.
Iha atividade sosializasaun ne’e, alende divulga informasaun kona-bá “Kriasaun BTL, E.P, partilla mos informasaun balun hanesan iha Dekretu Lei nú. 4/2004 de 11 de Fevereiro, kona-bá “Aprova Rejime Fornesimentu Bee ba Konsumu Públiku”, Diploma Ministeriál nú. 1/2004 de 11 de Fevereiro kona-bá Tabela Tarifária” nomos Diploma Ministeriál nú. 1/2009 de 5 de Outubro kona-bá “Fiskalizasaun Sistema Abastesimentu Bee”, hanesan matadalan ida ba konsumidór sira ne’ebé sai ona kliente ba BTL, E.P.
Objetivu hosi sosializasaun ne’e, hodi disemina ou partilla informasaun, kona-bá regra sira ne’ebé eziste iha Dekretu Lei no Diploma Ministeriál hirak ne’e, atu nune’e komunidade no entidade sira iha munisípiu ne’e, bele tulun komunidade sira hodi entende didi’ak, molok implementa regras hirak ne’e no komunidade sira mos bele koopera, hodi kontribui reseitas no labele komete aktu ou erru ne’ebé mak kontra enkuadramentu legál BTL, E.P nian, alende ne’e, hodi regulariza konsumidór sira wainhira asesu ona instalasaun sistema bee moos hosi BTL, E.P.
Iha abertura, Adjuntu Administradór munisípiu Aileu hatete, sosializasaun ida ne’e, bele tulun komunidade sira, hodi kompriende ba utilizasaun bee ho konsiénsia hanesan labele estraga infraestrutura públiku sira nomós Adjuntu husu ba komunidade sira ne’ebé partisipa iha sosializasaun ne’e, bele sai hanesan mensajeiru ida, hodi informa hikas ba populasaun sira seluk, kona-bá enkuadramentu legál sira ne’ebé ligadu ho servisu no proibisaun sira ne’e.
Alende ne’e, abitante Melánia da Costa Magno konsidera, sosializasaun ida ne’e interesante tebes, hodi bele hetan informasaun balun kona-bá regras sira no sei partilla fila-fali ba komunidade sira seluk ne’ebé seidauk hatene no abitante ne’e, promote sei koopera hodi kontribui reseitas no la komete aktu sira, hanesan koneksaun bee ilegál.
Enkuantu daudaun ne’e, iha munisípiu, maioria komunidade sira seidauk hetan metru kontadór maibé Koordenadór BTL, E.P munisípiu Aileu informa katak, sira planeia ona, iha fulan setembru ne’e, tékniku operadór sira sei tun ba terrenu, hodi instala metru kontadór ba kada uma kain, nune’e konsumidór sira bele kontribui reseitas ba Estadu, liuhosi selu tarifa bee.
Entretantu atividade ne’e abertura hosi Adjuntu Administradór Munisípiu Aileu no npartisipa hosi Komandante Operasionál PNTL munisípiu Aileu nian, Veteranu, komunidade no entidade sira seluk, iha munisípiu Aileu.
Fahe ba Sosial Media:
