Díli, 25/11/2022, Tékniku Operadór (T.O) Bee Timor-Leste, Empreza Públika (BTL, E.P) Zona 5 rezolve leakage control, iha área Lahane, suku Lahane Ocidental, postu-administrativu Vera Cruz, munisípiu Díli.
Atividade ne’e hala’o durante loron rua, hahú horseik maibé ho estragus ne’ebé grave, nune’e tékniku sira ohin mak konsege finaliza ho rezultadu di’ak, tamba bele distribui hikas bee ba eskola Medisina Lahane.
Tuir informasaun hosi terrenu katak, bee hosi liña distribuisaun ne’e la sirkula ho di’ak, tamba polly PE NOD 50 nakfera, kauza hosi ai-abut no fatuk mak hanehan metin liña distribuisaun refere. Alende ne’e, kanu ou liña distribuisaun bee ne’e rasik instala liuhosi hakoi iha moru protesaun okos, tamba ne’e, tékniku sira tenke esforsu hodi ke’e sai fatuk, nune’e bele hadi’a estragus refere.
Hafoin identifika no halo intervensaun ba estragus, konsege rezolve no daudaun ne’e eskola Medisina Lahane bele asesu hikas bee.
Fahe ba Sosial Media:
