Díli, 17/02/2023, Jestora Rekursu Umanu BTL, E.P ho ekipa, reprezenta Bee Timor-Leste, Empreza Públika (BTL, E.P), partisipa iha atividade limpeza jerál, ne’ebé organiza hosi kooperasaun entre Sekretaria Estadu Ambiente (SEA), liuhosi Diresaun Edukasaun no Informasaun Ambientál (CEIA) no kompañia Heineken Timor-Leste nomos Autoridade Munisípiu Díli. Atividade limpeza ne’e realiza iha aredores Cristo Rei, Díli.
Objetivu atividade limpeza ne’e, hodi asegura no kria ambiente nafatin moos, atu bele atrai turista no populasaun sira, hodi vizita fatin turístika refere, alende ne’e, hodi salva guarda ba planeta rai. Atividade ne’e mos, hodi konsiensializa públiku sira, atu labele so’e lixu arbiru iha fatin públiku, wainhira bá vizita Cristo Rei, tenke soe lixu iha lixeira ne’ebé prepara ona iha fatin ne’e, atu nune’e ambiente iha Cristo Rei nafatin moos.
Iha biban ne’e, selebra mos akordu Kooperasaun ba Atividade Asaun Corporate Social Responsibility entre Governu liuhosi SEA-CEIA no kompañia Heineken, estabelesimentu kooperasaun servisu entre parte rua ne'e, hodi fó servisu ba Brigada Ambientál nain 10, atu reforsa tan servisu limpeza nian, iha área Cristo Rei nian. Tanba Cristo Rei hanesan fatin markante ida ba turizmu no símbolu sidade Díli nian, nune’e wainhira hadi’a ou halo jestaun ne’ebé di’ak ba fatin ne’e, bele atrai vizitante barak nomos bele fó rendimentu ba munisípiu Díli.
Tuir akordu ne’ebé iha, Brigada sira ne’e sei hala’o servisu ho durasaun tempu fulan neen, maibé bele estende, wainhira halo avaliasaun hafoin tempu kontratu faze dahuluk ne’e remata. No Brigada sira ne’e sei hala’o servisu limpeza semana ida, dala tolu (segunda, kuarta no sesta-feira).
Enkuantu Brigada sira ne’e, la’ós hala’o servisu hanesan empregadór sira seluk, maibé sira hala’o servisu ho semi voluntária, nune’e loron ida ho kustu Dolar Amerikanu lima ($ 5, 00) hanesan kustu ba sira nia transporte no hahan nian.
Partisipa iha atividade limpeza ne’e, mak Sekretáriu Estadu Aambiente, funsionáriu SEA, Prezidente Autoridade Munisípiu Díli, BTL, E.P rasik, Country Director Heineken ho ekipa, Brigada Ambientál no entidade sira seluk.
Fahe ba Sosial Media:
