Baucau, 12/04/2023. Ekipa Bee Timor-Leste, Empreza Públika (BTL, E.P) Nasionál hosi Diresaun Enjeñaria no Investimentu (DEI) halo levantamentu dadus tékniku, kona-bá planu projetu melloramentu sistema bee mos, iha suku Abafala, postu-administrativu Quelicai, munisípiu Baucau.
Molok tun ba terrenu, hodi halo levantamentu tékniku ne’e, ekipa nasionál hala’o uluk enkontru hodi halo koordenasaun ho autoridade lokál sira no informa kona-bá objetivu no ekipa BTL, E.P nia prezensa iha suku refere.
Hafoin enkontru, ekipa DEI BTL, E.P akompaña hosi BTL, E.P munisípiu Baucau, xefe suku, na'in ba bee matan, inklui komunidade tun ba terrenu, hodi vizita bee matan sira hanesan, bee matan Sukara 1, Sukara 2, Guri-Mutu no Lawa-lian.
Objetivu hosi atividade levantamentu dadus tékniku ne’e, hodi identifika rekursu bee moos ne’ebé mak potensiál haktuir ba débitu bee ne’ebé mak tékniku sira sukat mo sura nomos foti koordenadas, observa tanke rezervatóriu no tanke BPT, observa lokál ne’ebé sei intalla liña transmisaun no distribuisaun bee nian, rekolla informasaun demografia no mapa limite administrativu, identifika lokalizasaun edifísiu públiku sira nomos área abitasaun urbana. Hafoin levantamentu dadus ne'e, Enjeñeiru hosi DEI sei halo uluk dezeñu, análize idrólika no sura BoQ, molok hakat ba prosesu tenderizasaun nian.
Enkuantu planu projetu melloramentu sistema bee ne’ebé sei implementa iha suku Abafala ne’e, sei uza sistema perfurasaun ho nia kapasidade 5lps unidade ida, hodi reforsa sistema bee ezistente sira, nune'e hodi fornese ba komunidade sira. Planu projetu melloramentu sistema bee moos ne’e, sei benefísia ba uma kain 315 iha suku Abafala ho nia populasaun 1452.
Bazeia ba dadus ne'ebé iha katak, sistema bee ezistente ne'e parte balun seidauk asesu ba bee moos, hanesan sentru saúde Abafala mos seidauk asesu bee, tanba ne'e, ho planu projetu melloramentu sistema bee ne'e, liuhosi perfurasaun hodi suporta sistema ezistente sira, nune'e bee bele sufisiente, hodi fornese bee ba fasilidade saúde ne'e.
Fahe ba Sosial Media:
