Ainaro, 19/06/2024, Diretór Enjeñaria no Investimentu (DEI) Bee Timor-Leste, Empreza Públika (BTL, E.P), João da Cruz Cardoso akompaña hosi Jestór Infraestrutura ho ekipa, halo monitorizasaun ba projetu perfurasaun bee, ne’ebé lokaliza iha aldeia Hudi-Laran, suku Aisirimou, postu-administrativu Aileu Villa, munisípiu Aileu.
Projetu perfurasaun iha postu Aileu Villa ne’e, ezekuta hosi kompañia H2O no obra fíziku finaliza ona, perfurasaun refere ho nia profundidade ou kle’an metru 60 (60m). Sistema perfurasaun foun ne’e, hodi reforsa sistema ezistente Mantane no sei fornese mos bee ba abitante sira suku Aisirimou, ne’ebé durante ne’e seidauk asesu ba bee moos.
Hafoin finaliza atividade monitorizasaun iha munisípiu Aileu, ekipa BTL, E.P ne’ebé lidera hosi DEI kontinua desloka ba munisípiu Ainaro, hodi kontinua monitoriza projetu konstrusaun sistema bee moos ne’ebé implementa hela iha postu-administrativu Maubisse Villa no atividade ne’e akompaña mos hosi Supervisor BTL, E.P nian ne’ebé destaka iha postu refere.
Atividade monitorizasaun ne’e, hodi observa direta obra fíziku ne'ebé la'o hela iha terrenu no atu hatene progresu servisu ne'e rasik nomos hodi garante kualidade projetu refere, nune'e wainhira finaliza, bele fó benefísiu ba populasaun sira iha Maubisse to’o tempu naruk.
Enkuantu projetu sistema bee moos ne'e, kompañia kontratór finaliza ona konstrusaun intake no tanke BPT, sei kontinua tan halo instalasaun ba liña transmisaun no distribuisaun inklui sei monta mos metru kontadór ba uma kain sira. No projetu ne'e wainhira finaliza, sei fornese bee ba benefisiáriu nomos repartisaun Estadu sira iha postu-administrativu Maubisse Villa.
Fahe ba Sosial Media:
