Manatuto, 17/08/2022, Ekipa BTL, E.P munisípiu Manatuto, kompostu hosi Apoiu Kliente (A.P) no Tékniku Operadór (T.O) fó karta notifikasaun ba kliente bee moos ne’ebé, asesu ona bee ne’ebé kanaliza hosi BTL, E.P maibé to’o ohin loron (fulan tolu ona) seidauk selu tarifa bee.
Akipa BTL, E.P hato’o karta notifikasaun ne’e, bazeia ba identifikasaun iha suku haat hanesan suku Aiteas, Sau, Ailili no Ma’abat, postu-administrativu Manatuto Villa, iha kliente balun, fulan tolu ona mak la selu impostu, ho nune’e, BTL, E.P Manatuto deside hodi fó notifikasaun ba kliente sira.
Koordenadór BTL, E.P munisípiu Manatuto informa, karta notifikasaun ne’ebé hato’o ba kliente ne’e, hodi fó tempu ba kliente sira, durante loron 10, atu bele halo pagamentu ou haka ba edifísiu BTL, E.P hodi halo justifikasaun kona-bá la selu tarifa bee, maibé liu loron 10 mak laiha informasaun no kliente sira la bá halo pagamentu, mak BTL, E.P sei ko’a ka dezliga bee ne’ebé dada ou instala ba konsumidór sira nia hela fatin.
Koordenadór BTL, E.P Manatuto akresenta, molok aplika selu tarifa bee ne’e, ekipa BTL, E.P tun ba terrenu, hodi halo sosializasaun iha kada aldeia no suku, hodi esplika ou fahe informasaun kona-bá asuntu refere.
“Antes aplika selu tarifa bee, ami (BTL, E.P Manatuto) halo uluk ona sosializasaun, iha aldeia no suku sira, hodi esplika ba sira kona-bá oinsa selu tarifa no bazeia ba Diploma nú hira mak ko’alia kona-bá selu impostu ne’e, maibé wainhira ita instala tiha metru kontadór no sira mos uza tiha bee, to’o agora la selu taxa, tamba ne’e mak ami deside hodi fó karta notifikasaun ba sira”, dehan Koordenadór BTL, E.P Manatuto.
Entretantu aplikasaun selu tarifa bee moos bazeia ba Diploma Ministeriál númeru 1/2004 loron 11 fulan Fevereiru, ne’ebé ko’alia kona-bá Tabela Tarifária, signifika katak komunidade sira ne’ebé asesu ona bee hosi BTL, E.P tenke selu tarifa bee moos nian, wainhira kliente sira la selu, mak BTL, E.P sei fó notifikasaun, no fó prazu loron 10 atu kliente refere bele halo pagamentu, maibé kliente la kumpri mak BTL, E.P sei foti medidas hodi dezliga ou ko’a sistema bee moos ne’ebé liga ba komunidade sira-nia hela fatin.
Enkuantu kontribuisaun hosi selu tarifa bee ne’e, hodi garante sustentabilidade ba manutensaun kona-bá atividade melloramentu sistema bee moos nomos promove projetu bee foun ba fatin seluk ne’ebé komunidade sira seidauk asesu ba bee moos.
Fahe ba Sosial Media:
