Viqueque, 05/10/2022, Tékniku Operadór (T.O) hosi Operasionál no Manutensaun (O&M) Bee Timor-Leste, Empreza Públika (BTL, E.P), munisípiu Viqueque hamutuk ho traballadór Mão de Obra, halo melloramentu ba kanu distribuisaun DN 100mm ne’ebé ku’ak iha Beloi suku Caraubalo, postu-administrativu Viqueque Villa, munisipiu Viqueque.
Koordenadór BTL, E.P munisípiu Viqueque informa, tékniku sira identifika katak, kanu distribuiaun bee DN 100mm ne’ebé ku’ak iha rai okos, tamba kanu refere tuan ona no tékniku sira esforsu hodi hadi’a liña distribuisaun ne’e hodi garante fornesimentu bee ba komsumidór sira ne’ebé durante ne’e asesu bee hosi kanu ne’e.
“Kanu distribuisaun ku’ak ne’e tamba kanu tuan liu ona, hahú kedas iha tempu Portugés no okupasaun Indonézia nian, maibé di’ak fila-fali ona, tamba ami solda ona”, dehan Koordenadór.
Koordenadór hatete, hafoin servisu melloramentu remata, sirkulasaun bee hosi liña distribuisaun ne’e normál fila-fali no bele distribui hikas bee ba konsumidór sira iha suku refere.
Fahe ba Sosial Media:
