Bobonaro, 7/10/2022, Ekipa BTL, E.P munisípiu Bobonaro halo levantamentu inisiál ba rekursu bee foun ou bee matan Bulobu ho nia bee salen ou bee tudak (Air Terjun), iha Maliana, munisípiu Bobonaro, ne’ebé rekomenda ona atu dada ba Maliana.
Objetivu hosi levantamentu inisiál ne’e, hodi haree besik liu bee matan no débitu bee ne’e rasik, atu kanaliza bee refere ba Maliana, hodi garante fornesimentu bee ba komunidade sira, iha postu-administrativu ne’e.
Koordenadór BTL, E.P Bobonaro hatete, rekursu bee ne’ebé planeia atu dada ba Maliana ne’e, hodi aumenta tan bee, atu nune’e bele responde ba demanda konsumidór nian.
Bee matan ne’ebé atu kanaliza ba Maliana ne’e, sei transforma ba iha sistema urbana ho gravitamente, nune’e bele minimiza ou hamenus despeza ba kustu enerjia eletrisidade.
Atividade levantamentu inisál ne’e, akompaña mos hosi entidade sira hanesan Administradór postu-administrativu Maliana, parte Agrikultura liu-liu Tékniku Planu Dezenvolvimentu Integradu Munisípiu nian, Tékniku SMASA no autoridade lokál sira seluk no distánsia bee matan ba Maliana Villa mais ou menus kilómetru tolu (3km).
Fahe ba Sosial Media:
