.Lautem,30 Juñu 2026 -Vise-Prezidente KE BTL, E.P ba Asuntu Korporativu, Manuel Tomas Amaral de Carvalho hamutuk ho Diretór DOM, Aleixo dos Santos, Jestór DAK no Ofisiál Legál, akompaña hosi Koordenadór BTL, .E.P Munisípiu Lautem,halo atividade sosializasaun kona-ba Dekretu Lei no Diploma Ministeriál, ba abitante sira iha,postu-administrativu,Luro munisípiu Lautem Tersa seman ne’e.
Iha atividade sosializasaun ne’e, BTL, E.P partilla detalla informasaun ba konsumidór sira, ligadu ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku” nune’e mós Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária”no ikus liu Diploma Ministeriál nú.1/2009 loron 5 fulan Outubru, kona-bá “Fiskalizasaun Sistema Abastesimentu Bee”.hodi nune’e abitante sira bele entende didi’ak regras BTL, E.P nian, liu-liu kona-bá oinsá atu selu tarifa bee, proibisaun ba koneksaun ilegál, labele estraga fasilidade públika nomos oinsá atu halo ligasaun foun.
Objetivu halo atividade diseminasaun ne’e, hodi partilla uluk informasaun detalla ba konsumidór sira, ligadu ho aplikasaun tarifa bee fulan-fulan nian no mekanizmu oinsá atu selu tarifa bee inklui kustu bee ne’ebé kliente sira sei selu kada fulan.
Tuir planu iha semana oin ekipa apoiu kliente hamutuk ho ekipa tékniku operadór BTL,E.P ne’ebe destakadu iha postu Luro sei hahu lee metru kontadór ba konsumidór sira ne’ebe uza sistema beemos iha postu refere hodi selu tarifa bee,hodi nune bele kontribui reseitas ba estadu.
Iha sosializasaun ne’e Vise-Prezidente (KE) BTL, E.P ba Asuntu Korporativu husu ba konsumidór sira, wainhira asesu ona beemos husi BTL,E.P husu atu labele uza sanyo hodi dada bee tanba wanhira konsumidór sira balun uza sanyo sei fó impaktu mós ba konsumidór sira seluk la hetan beemos ho diak.
Alende ne’e Vise-Prezidente Korporativu mós kontinua husu ba autoridade lokal no polisia komunitaria hamutuk ho komunidade sira,husu nafatin atu apoiu ekipa tékniku BTL,EP hodi kontinua kontrola fasilidades ne’ebe governu investe ona iha postu ne’e hodi nune fasilidade sira ne’e bele uza ba tempu naruk.
Iha okaziaun ne'e Diretór Operasaun no Manutensaun Aleixo Dos Santos mós esplika kona-ba lalaok no regra servisu tekniku nian ba konsumidór sira liga ba melloramentu sistema beemos iha postu ne'e.
Durante sosializasaun ne’e, lideransa suku no komunidade sira hato’o sira-nia apresiasaun ba BTL,E,P tanba bele halo investimentu sistema beemos iha sira nia postu ne’e. Alende ida ne'e hato'o mós sira nia rekomendasaun no susjestaun balun, ba BTL, E.P no BTL,E.P anota no sei haree oinsá bele halo intervensaun, hodi responde ba kestaun hirak ne’e ba tempu oin mai.
Partisipa iha atividade sosializasaun ne'e,sekretariu munisipiu Lautem ba asuntu administrasaun no finansas, Administradór postu-adminitrativu Luro Polisia eskuadra postu administrativu Luro no lideransa komunitária veteranos inklui komunidade sira iha postu referida.
Enkuantu tuir dadus BTL,E.P komunidade iha suku 3 hanesa Barikafa,Cotamutu no Luro ho total uma kain 1.720 no populasaun 7.970. mak sei hetan bemos husi investimentu sistema bemos iha postu Luro ne’e.
Fahe ba Sosial Media:
