Díli, 03/10/2025, Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Tékniku, Sr. José Filipe Ximenes Smith akompaña hosi Diretór O&M, Jestór DAK, Ofisiál Legál ho ekipa BTL, E.P hamutuk ho DNRAS, realiza atividade sosializasaun, iha aldeia Metin, suku Lahane Oriental, postu-administrativu Nain Feto, munisípiu Díli.
Iha atividade sosializasaun ne’e, hodi partilla informasaun ba abitante sira, liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”. Atu nune’e abitante sira bele entende didi’ak regras BTL, E.P nian, liu-liu oinsá atu selu tarifa bee, proibisaun ba koneksaun ilegál, labele estraga fasilidade públika nomos oinsá atu halo ligasaun foun ba uma.
Realizasaun atividade ne’e, hodi esplika uluk regulamentu sira ba komunidade aldeia Metin, molok ekipa BTL, E.P tun ba halo melloramentu ba sistema kanalizasaun bee, iha aldeia referida.
Ezekutivu BTL, E.P husu autoriedade lokál no komunidade sira-nia apoia no kolabora ho tékniku BTL, E.P nian, wainhira ekipa tun mai halo servisu melloramentu ba sistema kanalizasaun iha sira-nia aldeia no labele iha intervensaun ruma perante faze implementasaun iha terrenu.
Durante iha atividade sosializasaun ne'e, abitante sira hato’o mos sira-nia sujestaun no preokupasaun ne’ebé sira enfrenta durante ne’e liu-liu kona-bá falta bee moos, nune’e parte BTL, E.P anota preokupasaun sira no atu hatan ba kestaun hirak ne'e, iha tempu badak BTL, E.P sei tun ba terrenu hodi hahu halo servisu melloramentu, nune'e hodi kanaliza bee ba konsumidor sira.
Partisipa iha atividade diseminasaun ne’e, Lideransa Komunitaria nomos abitante aldeia Metin, suku Lahane Oriental.
Fahe ba Sosial Media:
