Díli, 31/07/2025, Vise-Prezidente Komisaun Ezekutiva (KE) Bee Timor-Leste Empreza Públika (BTL, E.P) ba Asuntu Tékniku, Sr. José Filipe Ximenes Smith no Vise-Prezidente KE BTL, E.P ba Asuntu Korporativu, Sr. Manuel Tomás Amaral de Carvalho akompaña hosi Jestór DAK ho ekipa BTL, E.P hamutuk ho PN-BESI-TL no DNRAS, realiza atividade sosializasaun kona-bá Dekretu Lei no Diploma Ministeriál, ba abitante sira iha aldeia Badiak, suku Manleuana, postu-administrativu Dom Aleixo, munisípiu Díli.
Iha atividade sosializasaun ne’e, BTL, E.P partilla informasaun ba abitante sira, liga ba regulamentu ne’ebé abrigu iha Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”. Atu nune’e abitante sira bele entende didi’ak regras BTL, E.P nian, liu-liu kona-bá oinsá atu selu tarifa bee, proibisaun ba koneksaun ilegál, labele estraga fasilidade públika nomos oinsá atu halo ligasaun foun.
Realizasaun atividade sosializasaun ne’e, hodi esplika uluk regulamentu sira ba komunidade aldeia Badiak, molok ekipa BTL, E.P tun ba halo melloramentu ba sistema kanalizasaun bee, iha aldeia referida.
Vise-Prezidente KE BTL, E.P ba Asuntu Tékniku hatete, sorumutu ohin ne’e importante tebes, tanba molok atu halo melloramentu ba sistema kanalizasaun iha aldeia ne’e, tenke hala’o uluk sosializasaun, hodi esplika regra sira nomos oinsá atu sai kliente BTL, E.P nian, atu nune’e abitante sira bele komprende, molok halo kanalizasaun bee moos.
Ezekutivu BTL, E.P husu autoriedade lokál no komunidade sira-nia apoia, atu servisu hamutuk ho tékniku BTL, E.P nian, wainhira ekipa tun mai halo servisu melloramentu ba sistema kanalizasaun iha aldeia Badiak no labele iha intervensaun ruma perante faze implementasaun iha terrenu.
Iha okazisaun ne’e, Koordenadór PN-BESI-TL esplika bee ne’e hanesan direitu báziku ema nian, tanba ne’e governu iha dever tenke hakonu, garante no fornese bee ba komunidade sira. Maibé komunidade sira mos, tenke kontribui no servisu hamutuk ho parte relevante, nune’e bele atinji ou responde ba populasaun sira-nia preokupasaun ba bee moos. Tanba ne’e, solisita ba abitante sira atu koopera ho tékniku BTL, E.P nian, wainhira sira tun mai halo servisu fíziku iha aldeia ne’e no labele iha empedimentu ruma iha terrenu.
PN-BESI-TL akresenta kontribuisaun ne’ebé komunidade fó liuhosi selu tarifa bee nian, la’os atu sosa bee, maibé BTL, E.P rekolla hodi hatama ba kofre Estadu, nune’e hodi ezekuta fila-fali hodi garante operasaun no manutensaun nian.
Administradór Postu-administrativu Dom Aleixo, José Soares hatete partisipasaun komunidade nian iha atividade ne’e importante tebes, atu nune’e bele rona direta esplikasaun no bele hato’o mos krítika ba BTL, E.P, maibé krítika ne’ebé konstrutivu, atu nune’e bele solusiona komunidade sira-nia preokupasaun kona-bá problema bee moos. Prezensa BTL, E.P nian la halo milagre, maibé sira-nia prezensa atu halo servisu, atende populasaun sira no oinsá bele hakmaan netik populasaun sira-nia halerik ba bee moos durante tinan barak. Tanba ne’e husu atu akompaña no rona didi’ak esplikasaun téknika sira hosi BTL, E.P nomos tenke kumpri regras no kritéria hirak ne’e.
Xefe aldeia Badiak husu ba abitante sira ne’ebé partisipa iha atividade sosializasaun ne’e, atu kolabora no rona didi’ak informasaun sira hosi BTL, E.P, wainhira iha preokupasaun ruma kona-bá bee moos bele hato’o direta ba parte BTL, E.P, atu nune’e sira bele anota no fó resposta.
Durante iha atividade sosializasaun ne'e, abitante sira hato’o mos sira-nia sujestaun no preokupasaun ne’ebé sira enfrenta durante ne’e liu-liu kona-bá falta bee moos, nune’e parte BTL, E.P anota preokupasaun sira no atu hatan ba kestaun hirak ne'e, iha tempu badak BTL, E.P sei tun ba terrenu hodi hahu halo servisu fiziku, nune'e hodi kanaliza bee ba konsumidor sira iha aldeia ne'e.
Partisipa iha atividade diseminasaun ne’e, Autoridade PA Dom Aleixo, Lideransa suku no aldeia nomos abitante aldeia Badiak, suku Manleuana.
Fahe ba Sosial Media:
