Lautém, 30/11/2022, Atu garante tékniku sira-nia saúde no seguransa iha terrenu, Ofisiál Saúde no Seguransa hosi Departamentu Kontrolu Kualidade no Ambiente (DCQA, sigla portugés) Bee Timor-Leste, Empreza Públika (BTL, E.P), Paulino Maria Dias, fó treinamentu ba tékniku operadór sira iha munisípiu 11, kona-bá saúde, seguransa no ambiente.
Objetivu hosi treinamentu ne’e, atu introduz regra ka prosedimentu sira ne’ebé ligadu ho servisu saúde no seguransa nian ne’ebé mak estabelese iha empreza BTL, hodi nune’e funsionáriu sira bele intende kona-bá importánsia hosi saúde, seguransa no ambiente hodi implementa iha sira nia servisu lor-loron iha terenu nomos partilla informasaun kona-bá importánsia hosi utilizasaun Ekipamentu Protesaun Pesoál (PPE, sigla inglés) hodi bele fó protesaun ba tékniku sira husi risku ne’ebé mak prejudika ba sira-nia aan rasik iha terenu.
Ofisiál Saúde no Seguransa BTL, E.P hatete, treinamentu ida ne’e esensiál tebes ba tékniku sira ne’ebé diariamente halo servisu fíziku iha terrenu, tamba bazeia ba regra interna saúde no seguransa BTL, E.P nian, define pontu importante tolu katak, BTL,E.P hakarak kria ambiente ne’ebé Seguru, Saudavel no Produtividade, ho ida ne’e mak DCQA liu sesaun seguransa hala’o atividade treinamentu ba tékniku sira, atu nune’e tékniku sira bele hetan koñesimentu kona-bá saúde, seguransa no ambiente, hodi bele asegura sira-nia aan hosi risku no asidente sira iha terenu katak “you have to find the hazards first, before it finds you”.
Ofisiál Saúde no Seguransa BTL, E.P husu ba tékniku operadór sira, atu mantein nafatin uza PPE ne’ebé sira nebe distribui ona ba sira durante ezekuta obra fíziku sira iha terrenu. Alende ne’e, tuir regras interna BTL, E.P nian define mos katak, funsionáriu tomak liu-liu tékniku proibidu konsumu alkóliku, droga sira nomos bandu fuma sigaru arbiru iha kondisaun sira ne’ebé mak bele hamosu inséndiu, hanesan utiliza materiál kombustivel sira, durante halo servisu iha terrenu.
Entretantu atividade treinamentu ne’e, hala’o iha munisípiu 11 hanesan, muniusípiu Manatuto, Viqueque, Baucau, Lautém, Manufahi, Aileu, Ainaro, Ermera, Liquiça, Bobonaro no Covalima.
Hafoin remata treinamentu parte DCQA BTL, E.P distribui mos PPE ne’ebé nesesáriu ba ezekusaun obra sira nomos ekipamentu protesaun seluk hanesan kapa udan, luvas solda no ókulo seguransa ba tékniku sira.
Tuir planu DCQA sei fó treinamentu ne’ebé hanesan ba tékniku operadór sira ne’ebé seidauk hetan treinamentu refere, hanesan tékniku operadór Zona 6, 9 no 11, munisípiu Díli.
Fahe ba Sosial Media:
