Díli, 04/10/2022, Atu garante estajiáriu sira-nia saúde no seguransa iha terrenu, Ofisiál Saúde no Seguransa hosi Departamentu Kontrolu Kualidade no Ambiente (DCQA, sigla portugés) Bee Timor-Leste, Empreza Públika (BTL, E.P), Sr. Paulino Maria Dias, fó treinamentu ba estajiáriu sira, kona-bá saúde, seguransa no ambiente. No treinamentu ne’e realiza iha salaun enkontru edifísiu sentrál BTL, E.P Caicoli.
Objetivu hosi treinamentu ne’e, hodi fó koñesimentu kona-bá Saúde, Seguransa no ambiente nomos partilla informasaun kona-bá oinsa atu utiliza Ekipamentu Protesaun Pesoál (PPE, sigla inglés) ne’e, atu bele fó seguransa ba estajiáriu sira no labele prejudika ou fó risku ba estajiáriu sira-nia aan rasik, iha terrenu, durante hala’o estájiu profisionál iha BTL, E.P.
Ofisiál Saúde no Seguransa BTL, E.P hatete, treinamentu ida ne’e esensiál tebes, tamba estajiáriu sira-nia estájiu profisionál ne’e, halo servisu fíziku diretamente iha terrenu, tamba presiza iha koñesimentu kona-bá saúde, seguransa no ambiente, nune’e bele ajuda sira, hodi asegura sira-nia aan, wainhira halo servisu iha terrenu.
“Treinamentu ida ne’e, atu fó koñesimentu ba sira oinsá mak bele kuidadu sira-nia aan wainhira hala’o estájiu iha terrenu tamba kuaze sira-nia servisu ne’e iha terrenu, hala’o servisu fíziku sira, hanesan solda no foti sasan kanu hodi halo instalasaun tanba ne’e klaru katak iha risku nia laran, tamba ne’e, ita informa ba sira atu bele asegura sira-nia aan”, dehan Nia
Ofisiál Saúde no Seguransa BTL, E.P akresenta, treinamentu ne’e importante tebes, tamba bazeia ba BTL, E.P nia estatutu regulamentu internu kona-bá saúde, seguransa no ambiente ba ema foun, tantu ba funsionáriu ou estajiáriu sira ne’ebé mai estájiu iha BTL, E.P, liu-liu ba sira ne’ebé servisu iha terrenu, presiza tuir treinamentu hodi partilla informasaun kona-bá saúde, seguransa no ambiente ba sira, wainhira sira tun ba terrenu, sira iha ona koñesaimentu oinsá bele kuidadu sira-nia aan iha terrenu, nune’e labele hetan asidente ruma.
Entretantu estajiáriu sira ne’ebé hala’o estájiu profisionál iha BTL, E.P liu-liu iha Diresaun Operasionál no Manutensaun (D.O.M), hamutuk nain 15, hosi Universidade Nasionál Timor Lorosa’e, Fakuldade Enjeñaria no Departamentu Mekániku, estájiu profisionál ne’e, durante fulan rua.
Hafoin remata treinamentu parte DCQA BTL, E.P fahe mos PPE ba estajiáriu sira, hodi bele uza, wainhira hala’o estájiu profisionál iha terrenu, nune’e bele proteje sira nia-aan.
Fahe ba Sosial Media:
