Díli, 30/09/2022, Atu garante traballadór sira-nia saúde no seguransa iha terrenu, Ofisiál Saúde no Seguransa hosi Departamentu Kontrolu Kualidade no Ambiente (DCQA, sigla portugés) Bee Timor-Leste, Empreza Públika (BTL, E.P), Sr. Paulino Maria Dias, fó treinamentu Safe Driving ba Kondutór BTL, E.P sira, kona-bá saúde, seguransa no ambiente. No treinamentu ne’e realiza iha salaun enkontru edifísiu sentrál BTL, E.P Caicoli.
Objetivu hosi treinamentu ne’e, hodi fó koñesimentu kona-bá Safe Driving no regra sira seluk, oinsá atu asegura pasajeiru (funsionáriu ou tékniku) BTL, E.P nian inklui kondutór rasik nia vida, durante iha viajen servisu ruma iha territóriu nasionál.
Ofisiál Saúde no Seguransa BTL, E.P hatete, treinamentu ida ne’e esensiál tebes ba kondutór sira, hodi partilla informasaun ba Kondutór sira, tamba sira mos asumi responsabilidade ida ne’ebé boot, oinsa atu asegura funsionáriu ou tékniku sira-nia vida, durante hala’o viajen servisu nian ho distánsia ne’ebé dook.
Nia akresenta wainhira atu hala’o viajen servisu ba kualker fatin, kondutór sira iha obrigasaun hodi pasa revista ba kondisaun veíkulu sira no kumpri regras no informasaun proibisaun balun ne’ebé mak estabelese ona, atu nune’e bele evita asidente iha dalan.
“Ita fó treinamentu ba kondutór sira, tamba ita hatene katak kondutór sira iha responsabilidade ida ne’ebé boot no importante teb-tebes, tamba sira mak lori transporte BTL, E.P nian, hodi transporta ita nia funsionáriu sira ba fatin dook, hanesan Díli ba munisípiu no munisípiu mai Díli, tamba ne’e liuhosi distánsia ne’ebé dook ne’e, ita haree ninia risku ne’e boot, entaun sira mos tenke hetan treinamentu, atu nune’e sira bele mellora liu tan sira-nia koñesimentu bai ha seguransa nian, wainhira sira lori kareta karik sira tenke halo tuir regulamentu sira ne’ebé mak ita estabelese, liu-liu hanesan sira tenke uza sintu, tenke halo inspesaun ba kareta nia kondisaun, bele garante katak kareta ne’e bele tula funsionáriu sira to’o iha fatin destinasaun ho di’ak nune’e mos labele konsumu alkóliku sira, wainhira hala’o viajen”, dehan Ofisiál Saúde no Seguransa BTL, E.P.
Parte DCQA mos informa ba kondutíor sira, wainhira iha iha saúde ou kondisaun ne’ebé la saudável, husu atu deskansa no automátikamente labele konduz transporte, tamba bele fó risku ba pasajeiru ou tékniku sira-nia vida inklui kondutór rasik nia vida.
Hafoin termina treinamentu, parte DCQA entrega mos Ekipamentu Protesaun Pesoál ba Kondutór sira.
Fahe ba Sosial Media:
