Ermera, 26/09/2022, Ekipa Tékniku ou Enjeñeiru hosi Diresaun Enjeñaria no Investimentu (D.E.I) (T.O) Bee Timor-Leste, Empreza Públika (BTL, E.P), akompaña hosi tékniku BTL, E.P munisípiu, Administradór postu-administrativu Atsabe, xefe suku no aldeia, hamutuk ho kompañia sira ne’ebé partisipa iha prosesu tenderizasaun, hala’o site visit ba projetu Konstrusaun Fornesimentu Sistema Bee Moos nomos ba fatin instalasaun tanke, liña transmisaun no distribuisaun bee nian, iha Zona Anilaba, postu-administrativu Atsabe, munisípiu Ermera.
Atividade site visit ba projetu konstrusaun ne’e, durante loron ida ho objetivu hodi lori kompañia 17 ne’ebé partisipa iha prosesu tenderizasaun ba projetu refere, ba vizita no observa direta lokál bee matan no esplika dezeñu ne’ebé atu harii ou instala tanke rezervatóriu bee nian inklui hatudu fatin sira ne’ebé hodi dada liña transmisaun no distrubuisaun bee nian, atu nune’e, kompañia sira bele ona fatin hirak ne’e, wainhira sira manan iha prosesu tenderizasaun ne’e, sira bele implementa tuir dezeñu ne’ebé mak ekipa BTL, E.P hatudu ona ba sira.
Molok tun ba terrenu, hodi hahú atividade site visit ne’e, ekipa D.E.I BTL, E.P ho kompañia sira hala’o uluk enkontru ho autoridade Postu-administrativu Atsabe no lideransa suku sira, hodi halo koordenasaun no introduz mos projetu sistema bee moos ne’ebé sei implementa iha fatin ne’e ba autoridade lokál sira.
Durante iha enkontru ne’e, Administradór postu-administrativu Atsabe, Constâncio da Silva apresia no hatete hafoin site visit ne’e, wainhira kompañia sira ne’ebé mak manan ba projetu ne’e, hanesan autoridade lokál sira prontu, atu servisu hamutuk ho kompañia sira, hodi implementa projetu konstrusaun fornesimentu sistema bee, iha Atsabe.
“Ida ne’e mak komunidade Atsabe hein, espera katak prosesu tenderizasaun hotu, iha tempu badak ami hein atu projetu ne’e bele realiza. Iha ne’e, nudár autoridade lokál prontu simu ita boot sira nia prezensa, tamba ida ne’e, nesesidade ida ne’ebé mak importante tebes, tamba wainhira tama ona ba fulan Agostu no Setembru bee laiha ou maran, nune’e ekipa tékniku sira mai halo ona observasaun katak iha bee matan rua mak sei lori ou kanaliza mai komunidade sira. Agradese ba ekipa tékniku sira tamba finaliza ona iha prosesu levantamentu dadus no daudaun ne’e, tama ona ba etapa tuir mai no tenderizasaun nian, ami hein katak kompañia ne’ebé mak liu, ita bele servisu hamutuk hodi implementa projetu ne’e, ha’u hanoin ema se de’it iha suku laran ne’e, laiha impedimentu ou sei la impede ita boot sira-nia prezensa iha fatin ne’e”, dehan Administradór Atsabe
Administradór postu-administrativu Atsabe agradese ba ekipa BTL, EP no kompañia sira, maske dook maibé esforsu hodi to’o iha bee matan no fatin instalasaun ba sistema bee nian, hodi observa direta fatin hirak ne’e.
“Agradese ba ita boot sira-nia viajen mai to’o iha ne’e, maske dook, maibé tamba ita nia ezijénsia ou komunidade nia ezijénsia ba nesesidade bázika, tamba ne’e ita boot sira tenke mai to’o iha ne’e”, dehan
Entretantu Projetu Konstrusaun Fornesimentu Sistema Bee Moos ne’e, sei benefisia ba komunidade sira iha suku tolu, hanesan suku Parami, Laclo no Malabe.
Fahe ba Sosial Media:
