Dili, 28 Maiu 2026 –Vise-Prezidente Komisaun Ezekutivu (KE) ba Asuntu tekniku José Filipe Ximenes Smith ho Vise-Prezidente Komisaun Ezekutivu ba Asuntu Korporativu Manuel Tomás Amaral de Carvalho akompaña husi Diretór Enjeñaria no Investimentu (DEI), João da Cruz Cardoso,partisipa iha debate no diskusaun ba orsamentu retifikativu iha plenária parlamentu nasionál.
Iha debate no diskusaun ne’e Parlamentu Nasionál (PN) aprova Orsamentu Retifikativu (OR) tinan 2026 iha faze jeneralidade ho votus a-favór 42, abstensaun 23 no kontra 0.
Primeiru-Ministru (PM), Kay Rala Xanana Gusmão lori Governu nia naran agradese bá bankada no komisarun sira ne’ebé simu ona pedidu hosi Governu hodi halo desizaun sira ho
karákter urjénsia. Agradese mós bá partisipasaun aberta, onesta, demokrátika hosi deputadu sira no bainhira aprovadu Governu sei ezekuta ho seriedade.
Xefe Governu iha nia intervensaun destaka pontu importante sira entre medida prinsipál sira ne’ebé prevee, destaka kriasaun rezerva estratéjika kombustível nasionál ida ho valór millaun $174,3, ho intensaun atu asegura maizumenus fulan hitu nesesidade nasionál bá kombustível bá produsaun eletrisidade, no mós programa subsídiu bá kombustível ho valór millaun $42 hodi hamenus impaktu hosi aumentu folin internasionál sira bá família no negósiu sira.
Proposta sira ne’e inklui mós medida sira seguransa alimentár nian liuhosi reforsu estoke foos nian iha Sentru Lojístika Nasionál, rekrutamentu bá kadetes PNTL nian, despeza sira ne’ebé asosiadu ho Prezidénsia Pro Tempore CPLP nian, no reforsu ba Rezerva Kontinjénsia Estadu nian.
Ho alterasaun ne’e, montante konsolidadu Orsamentu Estadu 2026 aumenta ho millaun $101,1, hosi biliaun $2,291 ba biliaun $2,392. Aumentu ne’e la’ós rezulta hosi aumentu transferénsia hosi Fundu Petrolíferu, maibé hosi reajustamentu hosi fonte finansiamentu sira, liuhosi utilizasaun saldu jestaun nian, saldu disponível iha konta bankária ne’ebé la efetivu, no reforsu hosi reseita doméstika sira.
Aprovasaun jerál proposta ne'e muda bá diskusaun detalladu entre loron 29 fulan-Maiu no loron 2 fulan-Juñu, ne'ebé kulmina iha votasaun jerál finál bá alterasaun da-huluk bá Lei Númeru 8/2025 hosi loron 27 fulan-Novembru.
Fahe ba Sosial Media:
