D𝐢́li,19 Juñu 2026. Prezidente Interinu Komisaun Ezekutiva (KE) Bee Timor-Leste, Empreza Públika (BTL, E.P), José Filipe Ximenes Smith, akompaña husi Diretór Operasaun no Manutensaun (DOM) Aleixo Dos Santo, hamutuk ho Jestór DAK ho nia ekipa no Ofisiál Legál BTL, E.P, halo sosializasaun ba komunidade sira hodi fahe uluk informasaun kona-ba regulamentu ne’ebé abrigu iha Dekretu Lei no mós Diploma Ministeriál kona-bá tabela tarifária, proibisaun ba koneksaun ilegál, no kritéria atu sai kliente BTL, E.P nian.
Iha atividade sosializasaun ne’e, ekipa tékniku BTL, E.P esplika informasaun detalla kona-ba Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Ekipa BTL.EP hala’o atividade sosializasaun ne’e iha aldeia Ospila Militar suku Lahane Osidental Postu-Administrativu Vera Cruz, Munisípiu Díli.
Objetivu husi sosializasaun ne’e oinsa mak bele fahe uluk informasaun kona-ba servisu BTL, E.P nian no regulamentu sira ne’ebé sita ona iha leten ba komunidade sira, hodi nune’sira bele entende ho diak.no mós kontinua husu sira-nia kolaborasaun no apoiu, antes tékniku sira tun ba halo servisu melloramentu sistema kanalizasaun bee,iha aldeia referida.
Durante atividade sosializasaun, Prezidente Interinu KE BTL, E.P husu ba Autoridade Lokal no Polisia Komunitaria hamutuk ho komunidade sira,husu atu apoiu ekipa tékniku BTL,E.P wanhira halo melloramentu sistema bee iha aldeia ne’e no kontinua atu tau matan nafatin labele estraga fasilidade publiku ne’ebe BTL,E.P oferese iha fatin ne’e nune komunidade sira bele uza ba tempu naruk.
Iha oportunidade ne’e Prezidente Interinu KE BTL, E.P mós husu ba autoridade komunitaria no komunidade sira iha suku refere atu tau matan no organiza malu hodi halo konservasaun ba bee matan ida iha mota ulun lahane nian no kuda ai nune bele asegura bematan ne’e ho diak.
Iha okaziaun ne’e Diretór Operasaun no Manutensaun (DOM) Aleixo dos Santos mós hateten iha tempu badak ekipa tékniku sira sei halo melloramentu sistema beemos ba komunidade sira iha aldeia Ospital Militar Lahane no Ainitas-Hun tanba ne’e husu ba autoridade lokal ho komunidade sira atu kopera , hodi ekipa tekniku BTL,E.P sira bele halo servisu ho diak.
Iha sosializasaun ne’e, autoridade lokal no komunidade sira hato’o mós agradesementu ba BTL,E.P tanba iha ona preparasaun atu halo melloramentu sistema beemos ba abitante sira iha fatin referida.
Partisipa iha atividade sosializasaun ne’e, reprezentante SMASA Munisipiu Dili no reprezentante komandante polisia eskuadra Vera Cruz ne’ebe reprezenta husi OPS suku Lahane Osidental no sefi suku Lahane Osidental, sefi aldeia husi aldeia 4 ho komunidede sira iha aldeia Ainitas-Hun no Ospital Militar Lahane.
Enkuantu tuir dadus BTL,E.P komunidade aldeia 2 mak sei hetan beemos husi melloramentu sistema kanalizasaun foun ho total uma kain 233 no populasaun 1.085 iha fatin referida.
Fahe ba Sosial Media:
