Covalima, 15 Agostu 2026 - Prezidente Komisaun Ezekutiva (KE) BTL, E.P Gustavo da Cruz , hosi Diretór Enjenaria no Investimentu (DEI) João da Cruz Cardoso no Kordenadór BTL,E.P Covalima hamutuk ho Ministru Obras Publikas no Vise-Ministru Insfraestrutura nomos Ministru Agrikultura Pekuária Peska no Floresta no membru governu balun akompaña Primeiru Ministru (PM), Kayrala Xanana Gusmão,halo lansamentu fatuk dahuluk ba projetu konstrusaun Irigasaun mota Lomea ne’ebé mak sei fornese bee ba natar iha suku rua,suku Beco no Tasilin hamutuk hetares 3.900 hodi hasa’e produsaun Ai-han iha parte Munisipiu Covalima.
Seremónia lansamentu ne’e hala’o iha Mota Lomea ne’ebe lokaliza iha Aldeia Maukola area suku Beco postu-administrativu Suai vila Munisipiu Covalima Sabadu semana ne’e.
Projetu konstrusaun irigasaun ne’e implementa husi kompañia PT Minarta Dutahutama hosi Indonezia ho durasaun tempu tinan rua resin ho orsamentu hamutuk US$15 millaun,
Hafoin lansamentu ba konstrusaun projetu irigasaun bee iha mota Lomea ne'e , Primeiru Ministru RDTL, Kayrala Xanana Gusmão, husu ba kompañia ne’ebé mak hetan projeitu ba konstrusaun irigasaun ne’e tenki servisu diak no servisu tuir tempu ne’ebé mak detremina tuir kontratu no husu mós ba autoridade no komunidade inklui joven sira atu kontribui ba dezenvolvimentu refere nune’e ba oin bele redus importasaun husi rai liur.
Iha Fatin hanesan, Ministru Agrikultura Pekuária Peska no Floresta, Marcos Da Cruz esplika, projetu irigasaun ne’e sei fó benifisiu ba ema barak tanba ne’e dezenvolvimentu iha setór agrikultura mak presija tebes infrastrutura baziku hanesan irigasaun hodi bele fasilita aihan ba komunidade sira.
Alende ne’e Prezidenti Autoridade Munisipiu Covalima hamutuk ho komunidade sira hato'o agradese ba nonu governu konstritusional ne’ebé mak halo desizaun diak hodi implementa projetu konstrusaun ba irigasaun mota Lomea ne’ebé mak sei fo benifisiu ba komunidade iha suku Beco no Tasilin.
Iha serimónia lansamentu fatuk dahuluk ne’e partisiap hosi Prezidente Autoridade Munisipiu Covalima,Reprejentante MPIE, Diretór ADN I.P, Diretór jerál no Nasionál MAPPF no , Autoridade lokal no lider komunitaria vetaranu no komunidade sira iha suku rua ne’e inklui PNTL ho F,FDTL
Fahe ba Sosial Media:
