Ermera,12 Setembru 2026- Prezidente Komisaun Ezekutiva (KE) BTL, E.P, Gustavo da Cruz, akompaña Primeiru-Ministru, Kay Rala Xanana Gusmão ho Ministru Obras Públikas, Samuel Marçal,ofisialmente halo lansamentu fatuk dahuluk ba Projetu Rehabilitasaun Estrada hosi Humboe to'o Ermera Vila Antiga. iha Ermera Vila Antiga, Sabadu semana ne’e.
Depois de halo lansamentu projetu rehabilitasaun ne’e,Primeiru Ministru Kay Rala Xanana Gusmão hateten,projetu rehabilitasaun estrada ne'e hanesan investimentu importante ida husi Governu atu hametin konektividade,hodi fasilita komunidade asesu ba merkadu, saúde no edukasaun, no hamenus izolamentu ba komunidade sira iha Munisípiu Ermera.
Iha okaziaun ne’e Ministru Obras Públikas Samuel Marçal mós informa ,nia parte garante katak projetu ne'e sei hala'o tuir padraun kualidade ne'ebé aas hodi garante durabilidade estrada nian no fó benefísiu ba populasaun durante tinan barak.Governu liuhusi MOP sei kontinua implementa projetu infraestrutura sira iha territóriu tomak hodi apoia dezenvolvimentu nasionál no hadi'a moris povu nian.
Partisipa iha serimónia ne'e Membru Governu,Membru Parlamentu Nasionál,Prezidente Autoridade Munisípiu Ermera, Reprezentante Igreja Katólika, Padre no Madre sira, Autoridade Lokál, Líder Komunitáriu, no Estudante sira.
Enkuantu projetu rehabilitasaun estrada ne’e ho distansia hamutuk kilo metru 6 ne'ebé , implementa hosi kompañia SALI-MAGU Unipesoal L,da. ho durasaun tempu tinan ida.
Fahe ba Sosial Media:
