Baucau,06/02/2026,Prezidente Komisaun Ezekutiva (KE) Bee Timor-Leste, Empreza Públika (BTL, E.P), Gustavo da Cruz,partisipa iha seremónia lansamentu fatuk dahuluk ba projetu reabilitasaun estrada urbana ho kilometru 23 iha Munisipiu Baucau.
Seremónia hatuur fatuk dahuluk ba projetu reabilitasaun estrada urbana ne’e,ofisialmente lansa direta hosi Primeiru-Ministru (PM), Kay Rala Xanana Gusmão, akompaña hosi Ministru Obra Públika (MOP), Samuel Marçal reprezentante Banku Mundiál no membru governu sira seluk iha Baucau vila antiga Postu-Administrativu Baucau Vila.
Rehabilitasaun estrada urbana pakote I (Seksaun 00+000-02+880.0 Ospitál Nagardjo- Baucau (Ospitál Rejionál Eduardo Ximenes), Munisípiu Baucau ho Kontratu; SSS/007/MOP - 2026, durasaun servisu fulan 24.
Projetu ne’e fiskaliza hosi Ministériu Obras Públikas ho montante orsamentu $4,735,021.55, responsabiliza hosi empreza Jova Construction Unipessoal Lda (Timor-Leste).
Alende ne’e, rehabilitasaun estrada urbana pakote III (Seksaun 1 - 5), Munisípiu Baucau Kontratu: SSS/008/MOP – 2026, durasaun servisu fulan 24, montante orsamentu $3,764,933.21 fiskaliza hosi Ministériu Obras Públikas, kontratór Vage'el Unipessoal Lda (Timor-Leste).
Iha ámbitu lansamentu projetu estrada ne'e, Primeiru-Ministru Xanana Gusmão apela bá empreza Timoroan sira ne’ebé sei implementa projetu ne’e atu servisu ho kualidade tanba obra ne’e povu nian no povu mak sei uza.
IX Governu Konstitusionál kontinua ho neneik maibé bebeik hala’o dezenvolvimentu liu-liu halo konstrusaun bá estrada bazeia bá Planu Estratéjiku Dezenvolvimentu Nasional (PEDN) períodu 2011–2030 ne’ebé aprova iha tinan 2011 hosi Parlamentu Nasionál (PN) ho objetivu hodi guia dezenvolvimentu Timor-Leste bá tinan naruk.
Objetivu prinsipál Governu Sentrál halo estrada bá munisípiu importante loos tanba bainhira estrada di’ak populasaun hosi suku bele la’o fásil bá sidade, bá merkadu, ospitál no eskola.
Alende ne’e, estrada di’ak bele hasa’e ekonomia lokál liu-liu produtu agrikultura no sasan seluk bele lori bá merkadu ho lalais, fó oportunidade servisu bá komunidade inklui Governu bele fó asisténsia saúde, edukasaun, seguransa ho lalais no efikás.
Iha oportunidade ne’e Prezidente Komisaun Ezekutiva (KE) Bee Timor-Leste,Empreza Públika (BTL, E.P), Gustavo da Cruz,simu orientasaun servisu husi Primeiru-Ministru (PM), Kay Rala Xanana Gusmão,atu rezolve sistema bemos iha Munisipiu refere.
Partisipa iha seremonia lansamentu ne’e, mak membru Governu balun,Membru Parlamentu,Reprezentante Banco Mundial, Prezidente Autoridade Munisípiu Baucau, Autoridade Postu-Administrativu sira, PNTL no F.FDTL,Lideransa Komunitária, komunidade Baucau no entidade relevante sira seluk.
Fahe ba Sosial Media:
