Díli, 21/10/2025, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, Vise-Prezidente KE BTL, E.P ba Asuntu Tékniku no Vise-Prezidente KE BTL, E.P ba Asuntu Korporativu, akompaña hosi Diretór DEI, Jestór Infraestrutura no Jestór RP & GIS hamutuk ho PMU Bee no Saneamentu inklui kompañia BTK Karya Timor-Leste hala’o sorumutu ho parte relevante sira hanesan, ANLA, I.P, BNU, UNTL, Banku Mandiri, PNTL, Aroma Timor, MOP, Pateo, EDTL, E.P, Loja Lay, PAM Díli, DNTT Trade Invest TL no Lideransa suku Colmera, iha sala reuniaun MOP, Caicoli.
Sorumutu ne’e, hodi sosializa ou partilla informasaun kona-bá perturbasaun atividade sira, ligadu ho implementasaun projetu konstrusaun drenazen D4 nian, ne’ebé daudaun ne’e, obra fíziku la’o hela iha terrenu.
Prezidente KE BTL, E.P hatete servisu fíziku ba konstrusaun drenazen D4 nian hahú ona hosi Porto Díli, nune’e iha tempu besik, sei abranje mai estrada protokulu diresaun hosi Porto Díli sa’e mai kruzamentu área Caicoli nian, tanba ne’e, perante obra fíziku la’o iha terrenu, sei perturba atividade hotu-hotu, liu-liu sei hamosu engarrafamentu nomos sei afeta ba atividade ekonómika no administrativa nian. Ho nune’e BTL, E.P konvida entidade relevante sira ne’ebé hala’o atividade negósiu nomos instituisaun Estadu no privadu ne’ebé besik iha área konstrusaun drenazen nian, hodi informa no deskute asuntu ne’e nomos atu akompaña kalendáriu implementasaun projetu ne’e rasik.
Ezekutivu informa, BTL, E.P esforsu atu servisu konstrusaun ne’e bele hala’o iha tempu kalan, nune’e iha tempu loron atividade sira seluk kontinua la’o normál. Maibé haree ba klima, tanba besik ona, atu tama ba tempu udan, ho nune’e, loron mos obra fiziku sei kontinua la'o, nune’e bele aselera projetu referidu, molok to'o tempu udan.
Durante iha diskusaun ne’e, entidade sira hato’o sira-nian sujestaun/rekomendasaun nomos preokupasaun liga ba implementasaun projetu ne’e no BTL, E.P ho kompañia implementadór sei nafatin halo koordenasaun no servisu hamutuk ho parte relevante sira, to’o projetu drenazen ne’e finaliza.
Tuir planu konstrusaun drenajen ne’e, iha faze rua, etapa dahuluk nian, hahú hosi kruzamentu Caicoli tun to’o Porto Díli, enkuantu faze daruak nian hahú hosi Liceu nian tesik ba parte Muzeu Rezisténsia nian, hafoin tun ba área Embaixada Portugal nian.
Projetu konstrusaun kanál D4 faze dahuluk nian, daudaun ne’e obra fíziku la’o hela iha terrenu, hahú ona hosi Porto Díli no tempu besik, sei abranje mai estrada boot diresaun Porto Díli to’o iha kruzamentu Caicoli ho nia largula metru haat (4m).
Implementasaun projetu konstrusaun kanál D4 ne’e, atu reduz ou rezolve inundasaun iha parte sentrál Díli nian, liu-liu área Caicoli, Audian no Vila-Verde.
Iha biban ne’e, Prezidente KE BTL, E.P agradese mos ba Prezidente ANLA, I.P, tanba bele emite ona lisensiamentu ambientál ba implementasaun projetu kanál D4 ne’e nomos renovasaun ba lisensiamentu ne’e rasik.
Fahe ba Sosial Media:
