Aileu, 28/12/2022, Ekipa nasionál hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P), lori kompañia sira bá hala’o site visit ba fatin kona-bá projetu pakote perfurasaun rekursu bee, iha postu-administrativu Aileu, munisípiu Aileu no postu-administrativu Atabae, munisípiu Bobonaro.
Atividade site visit hala’o durante loron rua, atividade ne’e ekipa BTL, E.P hala’o uluk iha postu-administrativu Aileu munisípiu Aileu, iha loron 28 fulan dezembru tinan ne’e, ho objetivu hodi lori kompañia sira ne’ebé sosa ona dokumentu projetu nian, bá observa direta fatin perfurasaun atu nune’e, wainhira kompañia ida ne’ebé mak manan ona tender bele iha hatene ona fatin hirak ne’e, hodi hala’o servisu tuir dezeñu ne’ebé mak eziste.
Hafoin remata hosi Aileu, iha loron 29 fulan dezembru tinan ne’e, ekipa DEI nasionál hamutuk ho kompañia sira kontinua dezloka ba postu-administrativu Atabae, munisípiu Bobonaro, hodi kontinua hala’o site visit, iha fatin refere.
Durante atividade site visit ne’e iha munisípiu rua ne’e (munisípiu Aileu no Bobonaro), akompaña mos hosi Koordenadór BTL, E.P munisípiu Aileu no Bobonaro, Autoridade lokál Aisirimou, reprezentante Administradór postu Atabae ho nia tékniku sira.
Molok hala’o atividade site visit, ekipa konjunta enkontru uluk ho autoridade lokál sira, hodi fó koñesimentu kona-bá prezensa ekipa BTL, E.P iha fatin ne’e no esplika mos atividade sira ne’ebé ekipa BTL, E.P sei hala’o iha munisípiu rua ne’e, nune'e iha implementasaun ba projetu refere, labele iha impedimentu hosi komunidade no mos lideransa komunitária sira.
Iha enkontru ne'e, Autoridade lokál no rai na’in sira koopera no prontu atu kontribui, nune'e bele kanaliza bee ba komunidade sira, iha munisípiu Aileu no Bobonaro.
Fahe ba Sosial Media:
