Lautém, 18/05/2023. Ekipa nasionál hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) akompaña hosi Koordenadór BTL, E.P munisípiu Lautém, lori kompañia sira bá hala’o site visit ba fatin ne'ebé planeadu ona, atu implementa projetu Melloramentu Sistema Fornesimentu Bee Moos no Pakote Supply & Installation Prefabricated Liner Tank, iha Postu-administrativu Iliomar nomos projetu Perfurasaun Bee Moos iha suku Soru, munisípiu Lautém.
Atividade site visit ne'e hala’o durante loron tolu, hahú hosi loron 16 to’o 18 fulan maiu tinan ne'e, ho objetivu hodi lori kompañia sira ne’ebé sosa ona dokumentu projetu nian, bá observa fatin ne'ebé iha futuru sei implementa projetu sistema bee moos no instalasaun tanke inklui lokál perfurasaun bee moos, atu nune'e wainhira kompañia ida ne’ebé mak manan tender ne'e, bele hatene ona fatin hirak ne’e, hodi hala’o servisu tuir dezeñu ne’ebé mak prepara hosi tékniku DEI BTL, E.P nian.
Planu ba implementasaun projetu Melloramentu Sistema Fornesimentu Bee Moos no Pakote Supply & Installation Prefabricated Liner Tank iha postu-administrativu Iliomar ne'e, sei kobre suku haat hanesan suku Iliomar I, suku Iliomar II, suku Ailebere no suku Fuat. Projetu ne'e mos, sei instala tanke rezervatóriu foun rua no tanke hirak ne'e ho medida metru kúbiku 65 (65m3) no ida seluk ho medida metru kúbiku 50 (50m3.
Iha atividade ne'e, akompaña hosi autoridade lokál sira no sira mos koopera di’ak ho ekipa BTL, E.P nian, hodi fasilita informasaun ou dadus balun ba ekipa nomos sai hanesan matadalan durante hala’o site visit iha terrenu.
Enkuantu projetu Perfurasaun Bee Moos iha suku Soru ne’e, sei utiliza hodi kanaliza bee ba komunidade sira ne’ebé hela iha suku Soru.
Orsamentu ne'ebé prevé ba projetu Melloramentu Sistema Fornesimentu Bee Moos iha postu-administrativu Iliomar ne'e hamutuk $ 888,585.77 no ba projetu Pakote Supply & Installation Prefabricated Liner Tank nian $ 93,803.83 enkuantu ba projetu Perfurasaun Bee Moos iha suku Soru ho montante $ 57,615.19
Fahe ba Sosial Media:
