Lautém, 16/05/2023. Ekipa nasionál hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P) akompaña hosi Koordenadór no tékniku BTL, E.P munisípiu Lautém, lori kompañia sira bá hala’o site visit ba fatin ne'ebé planeadu ona atu implementa projetu Melloramentu Sistema Fornesimentu Bee Moos no Pakote Supply & Installation Prefabricated Liner Tank, iha Postu-administrativu Lautém, munisípiu Lautém.
Atividade site visit ne'e hala’o iha loron 16 fulan maiu tinan ne'e, ho objetivu hodi lori kompañia sira ne’ebé sosa ona dokumentu projetu nian, bá observa fatin ne'ebé iha futuru sei implementa projetu sistema bee moos no instalasaun tanke sira, atu nune'e wainhira kompañia ida ne’ebé mak manan tender ne'e, bele hatene ona fatin hirak ne’e, hodi hala’o servisu tuir dezeñu ne’ebé mak prepara hosi tékniku DEI BTL, E.P nian.
Planu ba implementasaun projetu Melloramentu Sistema Fornesimentu Bee Moos no Pakote Supply & Installation Prefabricated Liner Tank iha PA Lautém ne'e, sei kobre iha suku Parlamento no suku Pairara. Projetu ne'e mos, sei instala tanke BPT ida, ho medida metru kúbiku 6 (6m3), tanke distribuisaun ida, ho medida metru kúbiku 20 (20m3) nomos tanke rezervatóriu tolu, tanke hirak ne'e ho medida, metru kúbiku 27 (27m3), metru kúbiku 48 (48m3) no ida seluk ho medida 62 (62m3), nune’e hodi bele akumula bee hafoin bele halo distribuisaun.
Iha atividade ne'e, akompaña hosi Autoridade postu Lautém, lideransa komunitária hosi suku Parlamento nian. Autoridade lokál sira mos apoia no koopera di’ak ho ekipa BTL, E.P nian, hodi fasilita informasaun ou dadus balun ba ekipa nomos sai hanesan matadalan durante hala’o site visit iha terrenu.
Orsamentu ne'ebé prevé ba projetu Melloramentu Sistema Fornesimentu Bee Moos ne'e hamutuk $ 654,645.76 enkuantu ba projetu Pakote Supply & Installation Prefabricated Liner Tank nian $ 168,396.64.
Fahe ba Sosial Media:
